Ishki ister ministriniń birinshi orynbasary Marat Qojaev Shymkentke jumys sapary barysynda qalalyq politsiia departamentiniń jeke quramy arasyndaǵy tártip pen zańdylyqtyń buzylýyn synǵa aldy - dep habarlaidy Tengrinews.kz tilshisi Shymkent qalalyq politsiia departamentiniń baspasóz qyzmetine silteme jasap.
Shymkentke Ishki ister ministriniń birinshi orynbasary Marat Qojaevtyń basshylyǵymen arnaiy top keldi. Buǵan Shymkent qalasy politsiia qyzmetkerleriniń ustalýy sebep boldy.
"Marat Qojaev qalalyq politsiianyń jumysty uiymdastyrý men tártip jaǵdaiyna qatysty jumysyn synǵa aldy. Qazirgi jaǵdai shuǵyl ózgeristerdi talap etetinin atap ótti", - dep habarlady baspasóz qyzmeti.
IIM arnaiy tobynyń músheleri qyzmetkerlerge qalalyq politsiianyń birqatar basshylary tártiptik jaýapkershilikke tartylǵanyn jetkizdi. Olardyń qatarynda PD bastyǵy Qairat Dálbekov te bar. Ministrdiń birinshi orynbasary Qojaev ony IIM basshysynyń baqylaýsyzdyǵy úshin jazalaý týraly buiryǵymen jeke tanystyrdy.
"Jaýapkershilikke tartýǵa politsiia qyzmetkerleri jasaǵan qylmystar men quqyq buzýshylyqtar sebep boldy. Olardyń arasynda jergilikti politsiia qyzmetiniń eks-bastyǵy, rota komandiri jáne patrýldik politsiia polkiniń eki qyzmetkeri, sondai-aq Abai aýdandyq politsiia basqarmasynyń qyzmetkerleri bar.
Jeke qurammen jumys isteý mindetine kiretin kadr apparatyna qatysty da qatań sharalar qabyldanatyn bolady. Prezidenttiń Qazaqstan halqyna "Jańa Qazaqstan" Joldaýyn iske asyrý maqsatynda politsiia qatarynda dórekilikke, jekjattyqqa jáne tamyr-tanysqa oryn joq. Búgin biz ishki ister organdarynyń adal, eńbekqor qyzmetkerlerin qoldaimyz. Azamattardyń konstitýtsiialyq quqyqtaryn saqtaý jáne zańnyń ústemdigi - bizdiń negizgi mindetimiz", - dedi Marat Qojaev.
