Shymkentte burynǵy politsiia qyzmetkerleri ártúrli merzimge sottaldy. Bir jarym jylǵa sozylǵan sot otyrysyna búgin núkte qoiyldy, dep habarlaidy "Ult aqparat".
Sotta qylmystyq top uiymdastyrdy dep aiyptalǵan Ońtústik Qazaqstan oblystyq IID Ákimshilik politsiiasy emtihan-tirkeý basqarmasynyń burynǵy bastyǵy Artyq Japparov 11 jylǵa bas bostandyǵynan aiyryldy. Taǵy alty politsei 10 jyldan jaza arqalady.
Ózge aiyptalýshylarǵa 8 jyl, 6 jyldan jaza taǵaiyndaldy.
Taǵy 23 adamǵa ártúrli merzimge bas bostandyǵyn shekteý jazasy belgilenip, olar sot zalynan bosatyldy. Onyń beseýi - burynǵy politseiler. Sottalýshylardyń shenin alyp qoidy, sondai-aq olar memlekettik qyzmet pen ishki ister organdarynda jumys isteý quqyǵynan ómir boiyna aiyryldy.
Bosatylǵandardyń barlyǵynan eshqaida ketpeý týraly qolhat alyndy. Qylmystyq kodekstiń 218-baby boiynsha taǵylǵan aiyp dáleldenbegeni úshin sottalǵandar bul bap boiynsha aqtaldy. Al QR QK 369-babynyń merzimi ótken úshin qysqartyldy.
