Mańǵystaý, Shyǵys Qazaqstan, Qostanai, Pavlodar oblystarynda jáne Shymkent qalasynda koronavirýs infektsiiasyn juqtyrýdyń jańa oqiǵalary týraly málimet berildi, dep habarlaidy "Ult aqparat" Memlekettik komissiianyń shuǵyl shtabyna silteme jasap.
Buǵan deiin habarlaǵanymyzdai, 22 sáýir saǵat 22.50-degi sońǵy málimet boiynsha, Qazaqstanda indetti juqtyrýdyń birden 65 oqiǵasy tirkeldi. Onyń ishinde Shymkent qalasynda - 28, Mańǵystaý oblysynda - 2, Shyǵys Qazaqstan oblysynda - 1, Qostanai oblysynda -1, Pavlodar oblysynda - 1.
Shymkent qalasynda virýs juqtyrǵan 28 azamattyń barlyǵy – naýqas adamdarmen qarym-qatynasta bolýyna orai karantindik statsionarda jatqandar.
«Qazirgi tańda jaǵdailary qanaǵattanarlyq. Bekitilgen hattamaǵa sáikes tiisti emdi qabyldap jatyr. Olarmen bailanysta bolǵan adamdar anyqtalyp, barlyǵy meditsinalyq baqylaýǵa alynýda. Aýrý oshaqtarynda zararsyzdandyrý jumystary júrgizilýde», - dedi Memlekettik komissiianyń shuǵyl shtabynan.
Sońǵy málimetterge sáikes, Shymkent qalasynda indettiń 131 rastalǵan jaǵdaiy tirkelgen.
Mańǵystaý oblysynda koronavirýs juqtyrǵandar - 73 jáne 21 jastaǵy Aqtaý qalasynyń turǵyndary. Olar naýqas adamdarmen qarym-qatynasta bolýyna bailanysty karantindik statsionarǵa jatqyzylǵan bolatyn. Zerthanalyq synama alynǵan. «PTR diagnostikalyq zertteý nátijeleri boiynsha COVID-19 diagnozy naqtylandy. Kazirgi ýaqytta naýqastar oblystyq juqpaly aýrýlar bólimine ornalastyryldy. Aýrý oshaqtarynda dezinfektsiialyq jumystar júrgizildi. Epidemiiaǵa qarsy is-sharalar qolǵa alynǵan», - delingen aqparatta.
Sońǵy derekterge sáikes, Mańǵystaý oblysynda koronavirýs indeti barlyǵy 18 adamnan anyqtaldy.
Pavlodar oblysynda koronavirýs infektsiiasy Ekibastuz qalasynyń 50 jastaǵy turǵynynan tabyldy. Er adam dene qyzýynyń kóterilip, ózin jaisyz sezinýine bailanysty meditsinalyq kómekke júgingen. «Sol sebepti aýrýhanaǵa jatqyzylǵan. Keiin oǵan pnevmoniia diagnozy qoiyldy. 21 sáýir kúni COVID-19 virýsyn juqtyrǵany belgili boldy. Onymen bailanys jasaǵan adamdar ortasy anyqtalyp, olardy oqshaýlaý jumystary júrgizilip jatyr. Epidemiiaǵa qarsy sharalar qolǵa alynǵan», - delingen habarlamada.
Pavlodar oblysynda infektsiia juqtyrǵan jalpy 38 adam tirkelgen.
Qostanai oblysynyń Jitiqara qalasynda koronavirýs infektsiiasyn taǵy 1 adamnyń juqtyrǵany anyqtaldy. Ol 46 jastaǵy áiel, ózine deiin naýqas adammen bailanysta bolǵan.
Onyń qarym-qatynas jasaǵan adamdary anyqtalyp, oqshaýlaý jumystary júrgizilip jatyr. Aýrý oshaqtarynda dezinfektsiialaý jumystary júrgizildi. Epidemiiaǵa qarsy is-sharalar qolǵa alynǵan.
Osy ýaqyttaǵy resmi málimetter boiynsha, Qostanai oblysynda indet barlyǵy 35 adamnan anyqtaldy.
Shyǵys Qazaqstan oblysynda qaýipti infektsiia Óskemen qalasynyń turǵynynan anyqtalyp otyr. 49 jastaǵy azamat 21 sáýirde COVID-19 diagnozy qoiylǵan adammen jaqyn bailanysta bolǵandyqtan, tekserýden ótken. 22 sáýir kúngi analiz qorytyndysy onyń da koronavirýs juqtyrǵanyn kórsetti.
«Epidemiologiialyq anamnez boiynsha oblystan tys jerlerge, basqa elderge shyqpaǵan. Naýqas oqshaýlanyp, tiisti em qabyldap jatyr. Jaǵdaiy ortasha dárejedegi aýyrlyqta. Qazirgi ýaqytta onymen qarym-qatynas jasaǵan azamattardy anyqtaý jáne oqshaýlaý, epidemiologiialyq tekserý jumystary júrgizilip jatyr», - delingen málimette.
Sońǵy derekterge sáikes, ShQO-da jalpy 12 adam koronavirýs infektsiiasyn juqtyrǵan.
