Foto: ua.depositphotos.com
Shymkent qalasynyń turǵyny Lýiza Atajanova 2022 jyldyń 22 qyrkúieginde úshinshi sábiin dúniege ákeldi. Biraq kesar tiligi arqyly jasalǵan ota kezinde áieldiń júregi toqtap qalǵan. Sodan beri áiel tórt ai boiy komada jatyr, dep habarlaidy Sputnik Qazaqstan agenttigi Astanatv.kz telearnasyna silteme jasap.
Lýizanyń týystary bul jaǵdaiǵa anesteziologty kinálaidy. Olardyń aitýynsha, dáriger júrgizilgen operatsiiadan keiin jumystan ketken.
"Bul jaǵdaiǵa anesteziolog kináli. Onyń qaida ketkenin bilmeimiz. Biraq sol kúnnen beri ony kórmedik. Qońyraýlarǵa jaýap bermeidi, bizge onyń telefon nómirin bergen", - deidi jábirlenýshiniń anasy Malika Atajanova.
Qalalyq densaýlyq saqtaý basqarmasy Lýiza Atajanovanyń em qabyldap jatqanyn, oǵan elordalyq mamandar atsalysyp jatqanyn túsindirdi.
"Qazirgi ýaqytta sananyń tereń zaqymdalýy baiqalady. Odan ári nevrologiialyq ońaltý jáne jaqsy kútim qajet. Osyǵan bailanysty densaýlyq saqtaý basqarmasynyń qatysýymen ótken meditsinalyq konsiliým sheshimi boiynsha naýqas odan ári ońaltý úshin kópbeiindi statsionardyń nevrologiia bólimine aýystyryldy", - dep tolyqtyrdy Shymkent qalalyq densaýlyq saqtaý basqarmasynyń baspasóz qyzmetindegiler.
Shymkenttik áieldiń jańa týǵan sábiine de tiisti kómek kórsetilip jatyr. 1300 gramm bolyp týǵan balanyń salmaǵy búginde úsh kelige jýyqtaǵan.
