Shymkent qalasynda erler jáne áielder arasynda ótken bokstan Qazaqstan chempionaty márege jetti, dep habarlaidy "Ult aqparat".
Álemde «qazaqtardyń salmaǵy» atanyp ketken 69 kelide qaraǵandylyq Abylaihan Júsipov pen jambyldyq Aslanbek Shymbergenov ringke shyqty.
Ekeýi de – halyqaralyq jarystarda olja salyp júrgen sportshylar. Abylaihan álem birinshiliginde eki márte qola medaldi jeńip alsa, Aslanbek – Aziia chempionatynyń kúmis júldegeri.
Bul kezdesýde Aslanbektiń qabaǵy jarylyp ketip, jekpe-jek merziminen buryn aiaqtalyp, jeńis A.Júsipovke berildi.
Esesine 75 kg salmaqta taǵy bir jambyldyq Ábilhan Amanqul atyraýlyq Nurqanat Raiysty utyp, jeńimpaz atandy.
91 kg salmaqta qos elordalyq boksshy Aibek Oralbai men Saǵyndyq Toǵambai finalda judyryqtasty. Bir qyzyǵy, ekeýiniń bapkerleri de bir, Asqar Erkebaev eken.
Bul joly A.Oralbai jeńis tuǵyryna kóterildi. Osy salmaqta Rio olimpiadasynyń kúmis júldegeri Vasilii Levit syrqattanyp qalýyna bailanysty jarysqa qatysqan joq.
Asa aýyr salmaqta Qazaqstan ulttyq quramasynyń kapitany, álem chempionatynyń eki márte kúmis júldegeri, qyzylordalyq Qamshybek Qońqabaev túrkistandyq Nurlan Saparbaidy jeńdi.
63 kg salmaqta aqmolalyq Ersultan Bolat finalda ringke shyqpaǵandyqtan, jeńis Almaty oblysynyń ókili Ertýǵan Zeinýllinovke berildi.
Osylaisha Qazaqstan chempionaty márege jetti, oǵan olimpiada litsenziiasyna ie bolǵan boksshylardyń da qatysýy doda deńgeiiniń joǵary ekendigin tanytty. Kútpegen nátijeler de bolmai qalǵan joq. Birqatar jas boksshylar ataqty sportshylardy joldan taidyrdy.
«Olimpiadaǵa joldama alǵan bes boksshymyz jeńimpaz atanyp, sol litsenziiaǵa laiyq ekendigin kórsetti. Ókinishke qarai, Zákir Safiýllin jaraqatyna bailanysty sheshýshi básekege qatysa almady. Vasilii Levit te jarystan tys qaldy. Osy chempionatta jastar jaqsy kórindi. Ásirese, 52 kg salmaqta básekelestik kúshti boldy. Jas boksshy Mahmud Sabyrhan joldama iegeri Sáken Bibosynovtan basym tústi. Sondai-aq 49 kg salmaqta 18 jastaǵy batysqazaqstandyq Daniial Sábit asa tájiribeli boksshy Temirtas Júsipovti 5:0 esebimen utyp, kóńilimizden shyqty. Endi Tokio olimpiadasyna jarty jyldai ýaqyt qaldy. Basty maqsat – soǵan myqtap daiyndalý», deidi Qazaqstan erler quramasynyń bas bapkeri Ǵalymbek Kenjebaev.
Áielder arasynda jalpykomandalyq esepte Nur-Sultan qalasy (3 altyn, 2 kúmis, 1 qola) kósh bastasa, Qostanai oblysy (2 altyn, 1 qola) ekinshi, shymkenttikter (1 altyn, 3 kúmis) úshinshi orynǵa ie boldy.
