Shymkentte zorlanǵan 19 jastaǵy boijetken úshinshi qabattan sekirgen. Qazir osy oqiǵa boiynsha qylmystyq is qozǵalyp, sotqa deiingi tergeý amaldary júrgizilýde, dep habarlaidy "QazAqparat".
Boijetkenniń qorǵaýshysy Erkin Qaharovtyń aitýynsha, 18 qańtar kúni boijetkendi erkinen tys alyp qashyp ketken.
«Arýjan ol jigitpen tanysyp, eki-úsh kún kezdesken, sosyn alyp qashqan. Barǵan soń ol kelin bolýǵa kónbegen. Biraq betin ashyp, rásimder jasalǵan. Qyzdyń ata-anasy onyń kónbegeni týraly bilmegen. Qyz bir apta boiy tósekke jatýǵa kelispegen, biraq 25 qańtar kúni ony erkinen tys zorlaǵan. Osydan keiin ol úshinshi qabattyń terezesinen sekirip ketken. Ol 31 qańtarda aýrýhanaǵa túskenimen, sol kúnnen bastap tergeý sharalary júrgizilmegen. Aýrýhanada júretin politseiler de nege ekeni belgisiz, bul qyzdyń jaǵdaiyna nazar aýdarmaǵan. Sosyn men aryzdanýǵa májbúr boldym. Artynsha Feisbýk áleýmettik jelisine jazǵannan keiin 4 aqpan kúni qylmystyq is qozǵaldy», - deidi Erkin Qaharov.
Qazir qyzdyń bel omyrtqasyna zaqym kelip, birneshe jerinen súiegi synǵan. Ortasha dárejede jaraqat alǵan boijetken aýrýhanada em qabyldap jatyr. Osy oqiǵaǵa bailanysty qalalyq PD búgin ǵana resmi málimet taratty.
«Aǵymdaǵy jyldyń 31 qańtarynda 19 jasar qyzdyń óz-ózine qol jumsaý áreketi boiynsha QR QK 105-baby («Adamdy ózin-ózi óltirýge deiin jetkizý») boiynsha sotqa deiingi tergeý júrgizilip jatyr. Oqiǵanyń barlyq mán-jaiyn anyqtaý úshin kúdikti ál-Farabi aýdandyq politsiia bólimine jetkizildi. QR QPK 201 jáne QR QK 147-baptaryna sáikes sotqa deiingi tergeý derekteri jariia etýge jatpaidy» delingen Shymkent qalalyq PD baspasóz qyzmetiniń habarlamasynda.
