Shymkentte 270 tazalaýshynyń jumysyn 8 adam ǵana atqaryp kelgen. Mundai kemshilikter kezekti prokýrorlyq tekserý kezinde anyqtaldy, dep habarlaidy "Ult aqparat".
Jergilikti atqarýshy organdardyń turmystyq qaldyqtardy jinaý men sanitarlyq tazalaý qyzmetterine tekserý júrgizgen prokýrorlar birqatar kemshilikterdi anyqtady. Qala prokýrory Maqsat Qojabaevtyń sózinshe, tazalyqqa jaýapty jekelegen mekemeler óz jumysshylarynyń sanyn 35 ese artyq kórsetip, jalǵan qujattar jasap kelgen.
Máselen, nebári 8 jumysshysy bar mekeme qajetti 270 jumysshyny jalǵan kórsetip otyrǵan. Sóitip, memleketten bólingen 210 mln teńgege búkil Qarataý aýdanyna sanitarlyq tazalaý qyzmetin kórsetýde.
«Osyndai zańsyzdyqtarǵa jol bergen mekemelerdi jeńimpaz etý aýdan ákimdikteriniń áreketsizdigi men baqylaýdyń múldem joqtyǵyn kórsetedi. Jergilikti atqarýshy organdar jumysynyń kemshiliginen 50-den astam kezdeisoq qoqys oryndary anyqtalǵan. Alaida osyndai olqylyqtar úshin bir jyldan astam ýaqyt boiy bir de bir tulǵa ákimshilik jaýapkershilikke tartylmaǵan» deidi prokýratýradan.
Shymshahardyń qoqys ordasyna ainalýynyń taǵy bir sebebi - tazalaý qyzmetin kórsetetin mekemelerdiń talapqa sai bolmasa da, memlekettik satyp alý konkýrsynda jeńimpaz atanýy. Tekserý kezinde olardyń qajetti tehnikalary joq, jumysshylary da jetispeitini anyqtalǵan.
Sondai-aq, qalada turmystyq qaldyq tastaý úshin qajetti 4 myń konteinerdiń ornyna nebári 2 myń konteiner ǵana bar bolyp shyqty. Jiyn qorytyndysymen jergilikti atqarýshy jáne ýákiletti organdardyń atalǵan baǵyttaǵy qyzmetterin qaita qarap, qala ákiminiń atyna usynys engizildi. Jekelegen ónim berýshilerdiń áreketteri boiynsha protsesýaldyq sheshim qabyldanyp jatyr.
