Shymkentte oqýshylar ýlanyp qalǵan mektepti qala ákimi Ǵabidolla Ábdirahymov tiisti sala jetekshilerimen birge baryp kórdi.
Ákim onda Tótenshe jaǵdaidyń shyǵý sebepterin anyqtaý jónindegi jumystardyń atqarylý barysymen tanysty.
Shahar basshysy mektepti tolyq aralap shyǵyp, Yntymaq shaǵyn aýdanyndaǵy gaz taratý pýnktinde boldy.
Qalalyq ákimdiktiń habarlaýynsha, mektepte tabiǵi gazdyń taralýy jónindegi boljam rastalmaǵan.
«Mamandar mektep ishi men syrtyndaǵy aýanyń synamasyn alyp, laboratoriialyq tekserýden ótkizdi. Mekteptiń sanitarlyq ahýaly qalypty, adam densaýlyǵyna keler qaýip joq. Oqiǵanyń mán-jaiyn anyqtaý jónindegi jumystar odan ári jalǵasady. Búgin mekteptiń jumysy toqtatylyp, sabaqtar erteń 20 naýryzdan bastap jumysyn jalǵastyratyn bolady. Bilim oshaǵynda tiisti sala mamandary jumys istep jatyr. Jaǵdai qala ákiminiń turaqty baqylaýyna alynǵan», delingen habarlamada.
Al, búgin qaladaǵy gazǵa jaýapty mekeme «QazTransGaz Aimaq» AQ resmi túrde tótenshe jaǵdaiǵa gaz iisiniń taralýy sebep bolmaǵanyn jetkizdi.
Osyǵan qarai, «QazTransGaz Aimaq» AQ tabiǵi gaz arqyly mundai tótenshe jaǵdaidyń bolýy múmkin emestigin resmi málimdeidi. Birinshiden, QR Ulttyq ekonomika ministrligi bekitken «Qalalyq jáne aýyldyq eldi mekenderdegi atmosferalyq aýaǵa qoiylatyn sanitarlyq-epidemiologiialyq talaptarǵa» sai, tabiǵi gazdyń (metan) qaýiptiligi IV sanatqa jatady jáne ol ýlandyrýshy gaz bolyp sanalmaidy. Ashyq aýada bir jerde jinaqtalyp turmaityndyqtan, eldi mekender aýasyn lastaityn tizimge de enbegen. Tabiǵi gazdy ýly gazben shatastyrmaý kerek! Ekinshiden, gaz taratý jáshiginen mektepke deiingi 600 metr aralyqqa aýadan jeńil gazdyń jetýi múmkin emes, ol birden aýaǵa tarap ketedi. Sondyqtan, 600 metr jerden ushyp jetken gaz qandai da bir bólmege (mekteptiń ishine) jinaldy degen tipti qisynǵa kelmeidi.
Osy rette, «QazTransGaz Aimaq» AQ apattyq-dispetcherlik qyzmeti oqiǵa ornyna dáldigi óte joǵary gaz mólsherin esepteitin «Pergam» zerthanasyn jiberdi. Júrgizilgen tekserýler mektep janynda, mektep aýmaǵynda, tipti stansa mańynda da gazdyń taralǵanyn anyqtaǵan joq.
Eske salaiyq, keshe Yntymaq yqsham aýdanyndaǵy N54 mektepte oqýshylar men mektep qyzmetkerleri jappai ýlanyp, toksikologiialyq aýrýhanaǵa túsken bolatyn.
Emdeý mekemesine túsken 41 bala men 4 eresek adamnyń bas ainalý, qusý jáne qysqa ýaqytta esten taný belgileri bolǵan. Bastapqy meditsinalyq kómek kórsetilgennen keiin barlyǵy úilerine jiberildi. Al, búgin elimizdiń bas sanitar-dárigeri Jandarbek Bekshin bul jaǵdaiǵa mektepten 600 metr qashyqtyqta ornalasqan taratý stansasynan tabiǵi gazdyń shyǵýy sebep bolǵanyn atap ketken bolatyn.
