Shymbulaq taý kýrorty 12 sáýirge deiin jumysyn toqtatty, dep habarlaidy "Ult aqparat".
«Qurmetti Shymbulaq taý kýrortynyń qonaqtary! Almaty qalasynyń bas sanitarlyq dárigeriniń 2021 jylǵy 27 naýryzdaǵy qaýlysyna sáikes, Shymbulaq TK óz qyzmetin 29 naýryzdan 12 sáýirge deiin toqtatady.Biraq biz kóńilimizdi túsirmeimiz, sizdi 12 sáýirden keiin taý baýrainda kóremiz dep úmittenemiz», - dep jazdy kýrorttyń ákimshiligi Instagram-daǵy paraqshasynda.
Aita keteiik, Almatyda karantin sharalary 12 sáýirge deiin uzartyldy.
Qaýlyǵa sáikes, JOO men kolledj stýdentteri, jalpy bilim beretin mektep oqýshylaryn qashyqtan oqytý formatyna aýystyrylady. Sondai-aq ata-anasynyń ótinishi boiynsha jalpy bilim beretin mektepterdiń 1-5, 9 jáne 11-synyptarda bala sany 15-ke deiin bolatyn kezekshi toptardy qurýǵa ruqsat berilgeni belgili boldy.
Kóńil kóterý mekemeleriniń (karaoke, biliard, kompiýterlik, túngi klýbtar men oiyn klýbtary, boýling ortalyqtary, balalar sporty men oiyn alańdary, attraktsiondar, batýttar jáne býkmekerlik keńseler men lotereialyq klýbtardyń) qyzmetine tyiym salynady.
