Shyǵys Qazaqstan oblysynda karantindik shekteýler qatańdatyldy, dep habarlaidy "Ult aqparat".
ShQO Bas memlekettik sanitarlyq dárigeriniń 18 shildedegi №10 qaýlysyna ózgerister engizildi. Epidemiologiialyq jaǵdaidy baǵalaý matritsasyna sáikes, búgingi tańda Shyǵys Qazaqstan «qyzyl» aimaqqa kirgen.
«Óńirdegi barlyq qala, aýdandardaǵy obektiler óz qyzmetin «qyzyl» aimaqtyń talaptary boiynsha júzege asyratyn bolady. «Ashyq» jobasyna qatysatyn nysandardy qospaǵanda, qalaaralyq, oblysaralyq, qalalyq avtobýs tasymaldary, jabyq jaǵajailar men akvaparkterdiń qyzmeti toqtatyla turady. Demalys jáne mereke kúnderi qoǵamdyq kóliktiń, «Ashyq» jobasyna qosylmaǵan qoǵamdyq tamaqtaný oryndarynyń, fitnes-ortalyqtardyń, sporttyq-saýyqtyrý obektileriniń, saýnalardyń, SPA-ortalyqtardyń, basseinderdiń, kinoteatrlardyń, teatrlardyń, kontsert zaldarynyń, filarmoniianyń, kompiýterlik klýbtardyń, boýling, biliard, karaoke zaldarynyń jáne kórmelerdiń qyzmetine tyiym salynady», - delingen qujatta.
Sondai-aq jańa jobaǵa qatyspaityn aýdany 2000 sharshy metrge deiingi azyq-túliktik emes taýarlardy satatyn obektiler, ashyq bazarlar, jármeńkeler, bilim berý ortalyqtary, balalar men eresekterge arnalǵan úiirmeler, balalar damý ortalyqtary senbi-jeksenbi kúnderi jabyq bolady.
Jumys kúnderi «Ashyq» jobasymen qosylǵan fitnes-ortalyqtar, sporttyq-saýyqtyrý obektileri, saýnalar, SPA-ortalyqtar, basseinder kelýshilerdi saǵat 20-00 deiin qabyldaidy.
