Shyǵys Qazaqstan oblysynda qar qursaýynda qalǵan 64 adam qutqaryldy, dep habarlaidy "Ult aqparat".
ShQO tótenshe jaǵdailar departamenti baspasóz qyzmetiniń málimetine súiensek, aldyn ala jasalǵan daýyldy eskertýge qaramastan óńir turǵyndary alys jolǵa shyǵýda.
Tarbaǵatai, Kókpekti jáne Altai aýdandaryndaǵy jol ýchaskelerinde 30-dan astam avtokólik qarǵa batyp qalǵan.
Qutqarýshylar shuǵyl kómekke attanyp, 64 adamdy evakýatsiialady.
«Eń qiyn jaǵdai Altai aýdanynda bolǵan. Qar qursaýynda qalǵan kólikterden 52 adam, onyń ishinde 6 bala qutqaryldy. Eshkim meditsinalyq kómekke muqtaj bolǵan joq», - dep habarlady vedomstvo ókilderi.
Kókpekti aýdanyndaǵy Baibýra ýchaskesinde qutqarýshylar 3 avtokólikti qardan shyǵardy. Kólikterde 9 adam bolǵan.
«Osy rette óńir turǵyndaryna daýyldy eskertý jasalǵan kezde alys saparǵa shyqpaý qajettigin eskertemiz. Joldardyń jai-kúiin «Dármen» mobildi qosymshasy arqyly tekserip otyrǵan abzal. Eger jolda qiyn jaǵdaiǵa tap bolsańyz, dereý «112» nómirine habarlasý qajet» delingen málimette.
