Kanadanyń Kalgari qalasynda short-trekten Álem Kýbogynyń birinshi kezeńi aiaqtaldy. Bul saiysta qazaqstandyq Abzal Ájiǵaliev kúmis medalǵa ie boldy, dep habarlaidy "Ult aqparat" Olympic.kz saityna silteme jasap.
Jańa maýsymdaǵy alǵashqy iri halyqaralyq jarys Qazaqstan komandasy úshin sátti ótti. Qazaqstandyq sportshylar álemdik deńgeide joǵary oryndarǵa shyǵýǵa daiyn ekendikterin kórsetti.
Osy tusta Abzal Ájiǵalievtiń 500 metr qashyqtyqta óner kórsetýin erekshe ataýǵa bolady. Ol Olimpiada chempiony - qytailyq Datszinge ǵana (39.915) jol berip, kúmis medaldi jeńip aldy. Aita keteiik, Abzal kórsetken 40.136 seýndtyq nátije Qazaqstannyń jańa rekordy bolyp tabylady. Al saiysta úshinshi oryndy Vengriiadan kelgen Shandor Liý ielendi.
«Maýsymnyń bastalýy sátti boldy. Birinshi kúni jartylai finalǵa deiin jettim, biraq ókinishke orai, medal ala almadym. Birinshi kezeńniń sońǵy kúninde finalǵa shyǵyp, ekinshi oryn aldym. Aqtyq synda Olimpiadanyń úsh chempionymen júgirdim. Maýsym endi bastaldy, jeńisterimmen áli qýantamyn dep úmittenemin», - dedi Ájiǵaliev.
1000 metr qashyqtyqta basty finalǵa Erkebulan Shamuhanov shyqty. Onyń qorytyndy nátijesi - besinshi oryn. Al finalǵa eki estafetalyq komanda qatysty: áielder jáne aralas komandalar. Ekeýi de barlyq qatysýshy quramdar arasynda besinshi orynǵa ie boldy. Áielder komandasyna Anastasiia Krestova, Ásel Taishmanova, Olga Tihonova jáne Iong A Kim engen. Aralas quramda Abzal Ájiǵaliev, Denis Nikisha, Anastasiia Krestova, Iong A Kim óner kórsetti.
Aldaǵy kúnderi AQSh-ta ótetin ekinshi kezeńge Ájiǵaliev qatyspaidy. Onda komandanyń tek bir bóligi ǵana jol tartady. Álem kýbogynyń ekinshi kezeńi 9-11 qarashada Solt-Leik-Sitide ótedi. Al atalǵan álem Kýbogynyń úshinshi kezeńi 7-9 jeltoqsanda Almatyda uiymdastyrylady.
