Qazaq qurylys jáne sáýlet ǵylymi-zertteý jáne jobalaý institýtynyń mamandary Shonjydaǵy dene shynyqtyrý jáne saýyqtyrý ortalyǵynyń qiraýynyń aldyn ala sebebin jariialady, dep habarlaidy "Ult aqparat".
Qurylys jáne turǵyn úi-kommýnaldyq sharýashylyq isteri komitetiniń tapsyrmasymen oqiǵa ornyna Qazaq qurylys jáne sáýlet ǵylymi-zertteý jáne jobalaý institýtynyń mamandary issaparmen jiberilgen bolatyn.
Mamandar Uiǵyr aýdanynyń Shonjy aýylyndaǵy qulaǵan dene shynyqtyrý-saýyqtyrý keshenin jedel tekserýdi aiaqtady.
Onyń nátijesi boiynsha apat «9» jáne «10» osteri boiynsha fermalarda bastalǵany anyqtaldy. Tsement-qum quiyndysy belgilengen jobalyq mólsherinen asyp ketken. Sondai-aq, jartylai fermalardyń joǵarǵy jáne tómengi beldikteriniń qosylystarynyń montajdyq túiinderi ár túrli kólemdegi alty burandamamen bekitilgen. Bul da jobadan aýytqý bolyp sanalady.
Tik júkteme kezinde fermalardyń montajdyq túiinderi tarala bastady, bul bir burandamanyń buzylýyna jáne kóldeneń júktemelerdiń fermalardan baǵandarǵa berilýine jáne 3-blok konstrýktsiialarynyń birtindep qulaýyna ákelgen.
Osylaisha, 3-bloktaǵy apattyń sebepteriniń biri - bekitilgen jobalaý sheshimderinen aýytqýy dep aitýǵa bolady.
Komitet Almaty oblysynyń ákimdigine QR qoldanystaǵy zańnamasynyń buzylýyna jol bergen tulǵalardy (merdiger, tehnikalyq jáne avtorlyq qadaǵalaý) jaýapkershilikke tartý týraly hat joldady.
Sonymen qatar, jobalaý qujattamasynda baǵandarmen qosylý túiinderi keltirilmegen jáne fermalardyń tirek taǵandarynyń qurylymy sipattalmaǵan. 2-blokqa janasatyn jerde 3-blok jabynynyń deńgeiinde deformatsiialyq jikterdi ornatý boiynsha sheshim shyǵarylmaǵan. Osyǵan bailanysty jobalyq qateler aiqyndaldy.
Apattyń sebepteri týraly túpkilikti tujyrymdar bloktyń tirek konstrýktsiialarynyń elementterinen iriktep alynǵan úlgilerdi esepteý jáne zerthanalyq synaý nátijeleri negizinde jasalady.
Aita ketý kerek, 21 qyrkúiekte Shonjy aýylyndaǵy dene shynyqtyrý-saýyqtyrý kesheniniń úshinshi blogynyń jumsaq jabynyn ornatý jumystary kezinde metall konstrýktsiialary qulaǵan bolatyn.
Qulaǵan bloktyń aýdany - 1058,4 sharshy metr. Bul ǵimarattyń birinshi jáne ekinshi bloktaryna áser etken joq. Qaza bolǵandar men zardap shekkender joq.
