El aýmaǵynda sýǵa túsýge jabdyqtalǵan 607 resmi jaǵajai bar. Bul týraly elordada ótken brifingte QR IIM Tótenshe jaǵdailar komitetiniń tóraǵasy Vladimir Bekker málim etti, dep habarlaidy QazAqparat.
«Shilde aiy shomylý maýsymynyń naǵyz qyzǵan kezi. Ókinishke qarai, sýda qaiǵyly jaǵdailar tirkelýde. Elimizde sýǵa shomylyp, balyq aýlaityn 50 myńnan astam aýmaq bar. Solardyń negizinde 607 resmi jaǵajai jasaqtalǵan», - dedi V. Bekker.
Onyń sózine qaraǵanda, shomylý maýsymy bastalǵaly beri 214 adam sýǵa batty. sonyń 75-i – balalar. Bul turǵyda 198 adam shomylýǵa arnalmaǵan jerde ajal qushqan.
TJK baspasóz qyzmetiniń málimetterine sáikes, 173 jaǵdaida adamnyń (onyń 54-i bala) kóz jumýyna shomylý kezinde álin durys baǵalamaýy sebep bolǵan.
Atalmysh qaiǵyly oqiǵalardyń kóbisi Túrkistan (25 adam), Almaty (24), Aqmola (21), Shyǵys Qazaqstan (20) jáne Pavlodar (18) oblystarynda tirkedi.
QR IIM Tótenshe jaǵdailar komiteti azamattardy sý aidyndarynda qaýipsizdik erejelerin saqtaýǵa shaqyrady.
Demalys oryndarda sýǵa mas nemese esirtki qabyldaǵan kúide túsýge; sýǵa qaiyqtan, kemelerden, bul maqsatqa arnalmaǵan zattardan sekirýge; belgiden ary asyp júzip ketýge; júzýge arnalmaǵan zattarmen júzýge; kemelerge jaqyndaýǵa; sý aidyndaryn lastaýǵa; jaǵada jáne kiim aýystyratyn jerde demalýshylardy jaraqattaýy múmkin qoqysty tastaýǵa; jalǵan kómek surap, dabyl qaqpaýǵa; tehnikalyq jáne eskertý belgilerine órmeleýge; úlken adamnyń qaraýynsyz balany sýǵa jiberýge; shomylyp jatqan balalardy qaraýsyz qaldyrýǵa tyiym salady.
