Shyǵys Qazaqstan oblysynda qutqarýshylar óńir jurtshylyǵyna sý tasqyny kezinde qalai áreket etý kerektigin túsindirdi, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, qutqarýshylar men «Qyzyl ai» qoǵamy oblystyq filialynyń eriktileri birlesip, sý tasqyny qaýpi bar aýyl turǵyndary úshin tótenshe jaǵdai kezinde áreket etý erejeleri týraly sheberlik saǵatyn ótkizdi.
«Arnaiy uiymdastyrylǵan seminarda Veselovka kentiniń halqyna sý basqan kezde qaýipsiz oryndardy anyqtaýdy jáne arnaiy manekenniń kómegimen zardap shekkenderge alǵashqy meditsinalyq kómek kórsetýdiń daǵdylaryn úiretti. Budan bólek, tótenshe jaǵdai kezinde árbir áreketti aldyn ala josparlaý qajettigi túsindirildi. Sheberlik saǵatyn uiymdastyrýǵa jergilikti atqarýshy organ ókilderi qoldaý tanytty», - delingen habarlamada.
Sonymen qatar shara barysynda departament qutqarýshylary eldi mekenge arnaiy ákelingen motopompamen sý sorý jumystarynyń qalai júrgiziletinin, arnaiy jabdyqtardyń qalai qoldanylatyndyǵyn kórsetti. Osyndai sheberlik saǵatyn Shyǵys Qazaqstannyń 10-ǵa jýyq aýylynda ótkizý josparlanyp otyr.
