Shyǵys Qazaqstan oblysynda karantin shekteýi 15 sáýirge deiin uzartyldy, dep habarlaidy "Ult aqparat".
Shyǵys Qazaqstan oblysy Bas sanitariia dárigeriniń jańa qaýlysy jariialandy. Onda jazylǵandai, óńir boiynsha karantin 15 sáýirge deiin uzartyldy. Shekteý sharalarynyń merzimi oblys aýmaǵynda COVID-19 infektsiiasynyń taralýy ózgergende qaita qaralýy múmkin.
Búginde COVID-19 juqtyrǵan naýqastardy emdeýge arnalǵan infektsiia statsionarlarynda tósek qorynyń toltyrylý deńgeii – 3.3%. Oblys boiynsha infektsiianyń reprodýktivtik R sany – 1,175.
«Semei, Kýrchatov qalalarynyń, Besqaraǵai, Borodýliha, Shemonaiha, Úrjar, Zaisan aýdandarynyń ákimderi, ShQO densaýlyq saqtaý basqarmasy, ShQO memlekettik kirister departamenti, ShQO politsiia departamenti, qalalar men aýdandardyń sanitarlyq-epidemilogiialyq baqylaý basqarmalary óńirdiń syrtqy shekaralaryna kirip-shyǵýdy baqylaý úshin Almaty oblysy tarapyna qoiylatyn 3 jáne Qaraǵandy men Pavlodar oblystary aýmaqtaryndaǵy 3 sanitarlyq bekettiń jumysyn qamtamasyz etýi tiis. Sonymen qatar «Aýyl», «Úbe», «Baqty», «Maiqapshaǵai» avtoótpe joldaryndaǵy ótkizý pýnktterinde 4 sanitarlyq beket qoiylady», - delingen qujatta.
«Qyzyl» aimaqtaǵy óńirden keletin adamda sanitarlyq beketterdi kesip ótken kezde COVID-19 infektsiiasynyń joqtyǵyn rastaityn PTR synamanyń teris nátijesi týraly úsh táýlikten (72 saǵattan) aspaityn anyqtamanyń bolýy mindetti.
