Shyǵysqazaqstandyq dárigerler COVID-19 infektsiiasynan emdelip shyqqan óńir turǵyndaryn immýndyq plazma donory bolýǵa shaqyrdy, dep habarlaidy "Ult aqparat".
Virýstan jazylǵan adamdardyń plazmasyn naýqastarǵa quiý arqyly immýndyq júieni nyǵaitýǵa bolady. Bul zerthanalyq jáne klinikalyq turǵydan dáleldengen.
«COVID-19 infektsiiasymen aýyrǵandardyń immýndyq plazmasy patsientterge juqpaly dertpen kúresýge kómektesedi. Qan quramynda antidenesi bar bir adam, kem degende jaǵdaiy aýyr eki naýqastyń ómirin saqtap qala alady. Apparattyq plazmaferezdi tapsyrý qaýipsiz. Eshqandai aýyrsyný da sezilmeidi», - dep habarlady ShQO Aqparat ortalyǵy.
KVI-diń ortasha jáne aýyr túrimen aýyryp, odan saýyǵyp shyqqan kez kelgen kámelettik jasqa tolǵan adam donor bola alady. Eń bastysy, aýrýdan aiyqqanyna kem degende eki apta ótse bolǵany. Plazma tapsyryp, dárigerlerge kómek kórsetý úshin jergilikti mekenjai boiynsha ODA-ǵa baryp, antidenege test tapsyrý kerek.
«Budan soń oblystyq qan ortalyǵyna baryp, emhanalyq-biohimiialyq kórsetkish pen qan tobyńyzdy anyqtaýyńyz qajet. Eger saraptama qorytyndysy oń bolsa, plazmaǵa tapsyrýǵa jiberedi. Atalmysh protsedýra úshin 7 AEK nemese 19446 teńge tólenedi. Koronavirýspen aýyrǵan naýqastarǵa qol ushyn bergisi keletin jandar oblystyq Qan ortalyǵyna: 8(7232)70 38 38 nemese 87057520964 telefon nómirleri boiynsha habarlasa alady», - delingen málimette.
