Shyǵys Qazaqstan oblysy Ulan aýdany Bozanbai orta mektebindegi tamaqtan ýlanǵan 36 oqýshy Óskemendegi meditsina mekemesine jatqyzylǵan, dep habarlaidy "Ult aqparat".
Bul jaily aimaq basshysy Danial Ahmetov óziniń Facebook jelisindegi jeke paraqshasynda jazdy.
«Bozanbai orta mektebi oqýshylarynyń densaýlyq jaǵdailaryna bailanysty jappai shaǵym tústi. Balalardyń dene qyzýy kóterilip, júrekteri ainyp, qusyp, ishteri ótken. Qazirgi tańda barlyǵy 82 bala dárigerlerdiń kómegine júgindi. Olardyń 36-sy Óskemen qalasyndaǵy Ana men bala ortalyǵyna jatqyzyldy. Balalar dárigerlerdiń baqylaýynda, jaǵdailary qalypty. Aldyn ala qoiylǵan diagnoz – jedel ishek infektsiiasy», - dedi ol.
Oblys ákiminiń aitýynsha, kesheli beri Bozanbaida arnaiy komissiia jumys isteýde. Onyń quramynda oblystyń bas pediatry, epidemiolog, infektsionist, sanitarlyq-epidemiologiialyq baqylaý qyzmetiniń mamandary jáne aýdan ákimi bar.
«Búgin aýylǵa qarai Bilim men Densaýlyq saqtaý basqarmalarynyń, Sanitarlyq-epidemiologiialyq baqylaý departamentiniń basshylary jáne oblys ákimi apparaty basshysynyń orynbasary jolǵa shyqty. Mekteptegi tamaqtandyrýdy ashanany jalǵa alǵan jeke kásipker uiymdastyrǵan. Qazirgi ýaqytta atalǵan fakti boiynsha QR QK-niń 304-baby 1-bóligine sáikes qylmystyq is qozǵaldy. Árine, bul ýákiletti organdardyń tamaqtandyrý jumysyn júieli baqylaýǵa almaǵandyǵynyń saldary. Sondyqtan, jaýapty tulǵalar jazaǵa tartylady», - dedi Danial Ahmetov.
Sondai-aq barlyq mektep, mektepke deiingi jáne arnaýly áleýmettik qyzmet kórsetetin mekemelerge tekserý uiymdastyrylmaq. Ata-analarǵa turaqty túrde jedel jáne naqty aqparat berý qajettigi eskertildi.
«Sonymen qatar Ana men bala ortalyǵynda emdelip jatqan balalar da ata-analarymen telefon arqyly bailanysqa shyǵyp otyrýlary qajet. Kesheden beri mektep karantinge jabylǵan. Oqýshylar qashyqtan oqý formatyna kóshirildi», - dedi óńir basshysy.
Esterińizge sala ketsek, osyǵan deiin ShQO-daǵy mektep oqýshylarynyń tamaqtan ýlanǵandyǵy habarlanǵan bolatyn.
