Shyǵys Qazaqstan oblysynyń Glýbokoe aýdanynda 15 naýryz kúni eki bala gazdan ýlanyp qaldy, dep habarlaidy "Ult aqparat" ShQO Tótenshe jaǵdailar departamentiniń baspasóz qyzmetine silteme jasap.
Baspasóz qyzmetiniń málimetterine qaraǵanda, Sekisovka aýylynda turatyn 2006 jyly týǵan jasóspirim men 2013 jyly týǵan onyń ápkesi Ana men bala ortalyǵyna túsken.
Belgili bolǵandai, zardap shekkenderdiń anasy tańerteń peshti jaǵyp, jumysqa ketken. Balalarmen birge úide ájesi qalǵan. Túski astan keiin balalar aýyryp turǵandaryn aityp, anasyna habarlasqan. Anasy dereý jedel járdem shaqyryp, balalar aýrýhanaǵa ortasha aýyr jaǵdaida jatqyzyldy. Ájesi gazdan ýlanǵan joq.
ShQO TJD Órt sóndirý zertteý synaq zerthanasynyń qyzmetkerleri páterdegi jylytý peshiniń as úide ornalasqanyn anyqtady. Balalar peshtiń jaramsyzdyǵynan jáne onyń tútindi durys tartpaýynan ýlanyp qaldy. Mamandar arnaiy quraldyń kómegimen úidegi kómirtegi totyǵynyń mólsherin ólshedi.
Qaiǵyly jaǵdaidyń aldyn alý úshin Glýbokoe aýdanynyń TJB mamandary tek jaramdy pesh jabdyqtaryn paidalanyp, peshtiń qurylysyndaǵy jaryqtardy ýaqytynda jóndeýdi, murjany ýaqtyly tazalap turýdy eskertti.
«Tótenshe jaǵdailar týyndaǵan jaǵdaida «101» jáne «112» nómirlerine qońyraý shalyńyz», - delingen habarlamada.
