Arheolog Zeinolla Samashev bastaǵan zertteýshiler Shyǵys Qazaqstannyń Aqbaýyr shatqalynan saq zamanynan beri saqtalǵan metallýrgiialyq jádigerlerdi tapty, dep habarlaidy "Ult aqparat".
Shyǵys Qazaqstannyń Ulan aýdanyndaǵy Aqbaýyr shatqalynda Zeinolla Samashevtiń basqarýymen júrip jatqan qazba jumystary taǵy bir qundy ǵylymi jańalyqqa jol ashatyn túri bar. «Altai-Tarbaǵatai qola dáýirinen erte orta ǵasyrlarǵa deiin» atty jobanyń aiasynda arheologtar bes iri eldi mekende, eki qorshaýda, eki ejelgi qazbada jáne jerleý-eske alý sipatyndaǵy nysanda zertteý júrgizgen.
Ekspeditsiia jetekshisi Zeinolla Samashev tabylǵan jádigerler ejelgi saqtardyń tek mal baǵyp qana qoimai, qolónermen, metallýrgiiamen shuǵyldanǵanyn aiǵaqtaidy dep otyr. Shyǵys Qazaqstan oblysynyń ákimi Danial Ahmetov Aqbaýyr shatqalynda bolyp, zertteý barysymen tanysty.
«Biz bul jumystardan ata-babalarymyzdyń metallýrgiia men taý-ken óndirisin meńgergenin kóremiz. Babalarymyzdyń kenniń syryn jetik meńgergenin dáleldeitin jádigerler maqtanysh sezimin týǵyzady. Sondai-aq, sol kezdiń ózinde eńbek bólinisi bolǵanyn baiqaýǵa bolady. Bireý eginshilikpen, bireý metallýrgiiamen ainalysqan. Munda óndiristik keshender, metall jáne aýylsharýashylyq ónimderin óńdeitin sheberhanalar, súiekterdi óńdep, tas quraldar jasaityn sheberhanalar, qysh peshteri, temir ustasy bolǵan. Bul bizdiń dáýirimizge deiingi 11 ǵasyrda bizdiń ata-babalarymyzǵa tek kóshpeli ómir saltyn ǵana emes, otyryqshy ómirde qatar alyp júrgenin dáleldeidi», - dedi Danial Ahmetov.
Ol tabylǵan zattar týristerdi tartýǵa taptyrmaityn jádiger bolatynyn atap ótti. Kóp uzamai bul jerden tabylǵan qundy zattardan ekspozitsiia zaly jasaqtalmaq. Erekshe keskindi proto-qalany shyny kúmbezben jaýyp, aspan astyndaǵy mýzei etý josparlanyp otyr.
