Shyǵys Qazaqstan oblysy Altai aýdanynda eki zeinetkerdi qatygezdikpen óltirgen qaskói ustaldy, dep habarlaidy QazAqparat.
ShQO Politsiia departamenti baspasóz qyzmetiniń málimetine súiensek, osy jyldyń 25 qańtarynda tańerteń Altai aýdany Pribrejnyi kentiniń turǵyndary kórshi úidiń órtenip jatqanyn kórdi. Oqiǵa ornyna kelgen órt sóndirýshiler tilsiz jaýdy aýyzdyqtaǵan soń, edende zorlyq-zombylyqpen óltirilgen 83 jastaǵy áiel men 74 jastaǵy er adamnyń máiitterin tapty.
«Olardyń denesinde kóptegen pyshaq jaraqattary bolǵan. Atalǵan fakti boiynsha politseiler QR QK-niń 99-baby 2-bóligine (kisi óltirý) sáikes sotqa deiingi tergeý amaldaryn júrgizdi. Alaida sol kezde qylmyskerdi tabý múmkin bolmaǵan», - dedi departament bastyǵynyń orynbasary Talǵat Shaiahmetov.
Osy jyldyń qazan aiynda aýyr qylmysqa qatysy bar kúdikti anyqtaldy. Ol jábirlenýshilermen arazdasyp júrgen 37 jastaǵy er adam bolyp shyqty. Kisi óltirgennen keiin ádeii úidi órtep, oqiǵa ornynan qashyp ketken. Qazirgi ýaqytta kúdikti qamaýǵa alyndy. Eger sot ony kináli dep tanysa, 20 jylǵa deiin nemese ómir boiy bas bostandyǵynan aiyrý jazasy taǵaiyndalýy múmkin.
