Shyǵys Qazaqstan oblysynda túske deiin aýyl ákimderiniń sailaýynda turǵyndardyń 50 paiyzy daýys berdi, dep habarlaidy "Ult aqparat".
ShQO Aqparat ortalyǵynyń málimetine súiensek, aýyldy jerlerde daýys berý qalalarǵa qaraǵanda belsendi ótýde. Óitkeni, aýyldaǵy azamattar kóbinese óz eldi mekenderin basqaratyn adamdardy jaqsy biledi.
Shyǵys Qazaqstanda sailaý 194 eldi mekende ótýde. Aldyn ala málimetter boiynsha saǵat 12.00-de halyqtyń kelýi sailaýshylardyń jalpy sanynyń 50 paiyzynan astamyn qurap otyr. Oblystyq sailaý komissiiasynyń tóraǵasy Ersaiyn Nábievtiń aitýynsha, sailaý talapqa sai ótip jatyr, eshqandai buzýshylyqtar tirkelmegen.
Oblystyq SEB departamenti basshysynyń orynbasary Ǵalymbek Alin sailaý ýchaskelerinde sanitarlyq-epidemiologiialyq normalar saqtalýy tiis ekenin eske saldy.
«Sailaý ýchaskesinde sailaý komissiialarynyń músheleri men qatar dene qyzýy kóterilgen, sondai-aq koronavirýs infektsiiasynyń basqa da belgileri bar adamdardyń bolýyna tyiym salynady. Statsionarlyq jáne tasymaldanatyn jáshikterdi ashar aldynda sanitarlyq óńdeý júrgizý qajet. Barlyq rásimder aiaqtalǵannan keiin, daýys berýge arnalǵan mekeme tolyq dezinfektsiialanýy tiis, - dedi Ǵalymbek Alin.
