Shyǵys Qazaqstan oblysynda qatań tártiptegi túzetý mekemesiniń mańynda 90-ǵa jýyq esirtki dozasyn jerge kómip ketken er adam qoǵamdyq jumysqa tartyldy, dep habarlaidy "Ult aqparat".
ShQO boiynsha QAJ departamenti baspasóz qyzmetiniń málimetine súiensek, sottalýshy Glýbokoe kentinde jabaiy soranyń birneshe butasyn julyp alyp, ony jeke paidalaný úshin keptirgen. Esirtkini úsh túrli polietilen paketke salǵan er adam ony Óskemen qalasyna alyp kelip, qaýipsizdigi joǵary túzetý mekemesi mańyna jasyrdy. Osylaisha, ol 90-ǵa jýyq dozany jerge kómgen.
Politsiia qyzmetkerleri er adamdy kezekti dozany jasyrý úshin jerdi qazyp jatqan kezde ustady. Saraptama qorytyndysyna sáikes, tárkilengen zattyń «keptirilgen marihýana» ekendigi dáleldendi.
Óskemen qalalyq sotynyń úkimine sáikes 40 jastaǵy aiyptalýshy QR Qylmystyq kodeksiniń 296-baby 3-bóligimen kináli dep tanyldy. Oǵan esirtki zattaryn zańsyz saqtaǵany úshin 100 saǵattyq qoǵamdyq jumysqa tartý túrinde jaza taǵaiyndaldy. Belgili bolǵandai, ol buǵan deiin de birneshe ret qylmystyq jaýapkershilikke tartylǵan.
«Sottalǵan azamat probatsiiaǵa esepke qoiylyp, turǵylyqty jeri boiynsha qoǵamdyq jumystardy óteý úshin jiberildi. Er adamǵa avtobýs aialdamalarynda qoqys jáshikterin tazalaý boiynsha jumys taǵaiyndaldy. Sonymen qatar probatsiia qyzmetkerleri oǵan qoǵamdyq jumystardan jaltarǵan jaǵdaida, qamaýǵa alynatyndyǵy týraly túsindirdi», - dedi Úlbi aýdandyq probatsiia qyzmetiniń mamany Nazgúl Batyrhanova.
