Shyǵys Qazaqstan oblysynda shekaralyq aýdandardy damytý maqsatynda 2020-2024 jyldar aralyǵynda 218 mlrd teńge jumsalady, dep habarlaidy "Ult aqparat".
Shekara mańyndaǵy 5 aýdan halqynyń ómir súrý sapasyn jaqsartý maqsatynda keshendi jospar ázirlendi. Bul týraly oblys ákimi Danial Ahmetov halyqqa esep berýinde aitty.
«2020-2024 jyldar aralyǵynda 218 mlrd teńgege bólinip, Kúrshim, Zaisan, Tarbaǵatai, Katonqaraǵai jáne Úrjar aýdandarynyń máseleleri men keleshegi jiti pysyqtaldy. Osy rette, ótken jyly Kúrshim men Úrjar aýyldarynda 2 júzý basseini, Maqanshy aýylynda sport modýli salyndy. Sondai-aq 17 ekipáterlik jáne 1 otyz páterlik úi paidalanýǵa berildi. 3 kóppáterli úidiń qurylysy bastalyp, 105 bilim berý, 6 densaýlyq saqtaý, 9 sport, 31 mádeniet obektileri, 270 shaqyrymnan astam joldar men kósheler jóndeldi», - dedi aimaq basshysy.
Onyń aitýynsha, Tarbaǵatai, Kúrshim jáne Úrjar aýdandarynyń aýyldaryna sýmen jabdyqtaý jelileri tartylyp, 18 eldi mekenge blokty-modýldi stantsiialar ornatyldy. Shekaralyq aýdandardyń aýrýhanalaryndaǵy perzenthana bólimshelerin II deńgeige aýystyrý úshin 989 mln teńgege meditsinalyq jabdyqtar satyp alyndy.
«2021 jyly 4 kóppáterli turǵyn úi, 8 sý qubyry, 4 dene shynyqtyrý-saýyqtyrý kesheni, 2 sport modýli jáne 3 mádeniet obektisiniń qurylysy josparlanyp otyr. 26 bilim berý, 3 densaýlyq saqtaý, 4 sport, 6 mádeniet obektisinde jóndeý jumystary júrgizilmek. 12 sý qubyry jáne 230 shaqyrymnan astam joldar men kósheler jóndeletin bolady. Jalpy biyl bes shekaralyq aýdandy damytýǵa 59 mlrd teńge jumsalady», - dedi Danial Ahmetov.
Esterińizge sala ketsek, osyǵan deiin Shyǵys Qazaqstanda 11 myń jumys ornyn ashatyn 38 joba iske asyrylatyndyǵy habarlandy.
