Shyǵys Qazaqstan oblysynda mamandar tikushaqpen sý tasqyny jaǵdaiyna bailanysty monitoring júrgizdi, dep habarlaidy "Ult aqparat".
ShQO TJD departamenti baspasóz qyzmetiniń málimetine súiensek, monitoring júrgizý maqsatynda óńir aýmaǵyndaǵy sý tasqyny qaýpi bar ýchaskelerge baqylaý júrgizildi. Sharaǵa Shyǵys Qazaqstan oblysy ákiminiń orynbasary Baqytjan Baiahmetov, ShQO TJD, «Qazseldenqorǵaý» ShQ filialy jáne «Qazgidromet»RMK mamandary qatysqan. Aerovizýaldy baqylaý «Óskemen-Glýbokoe aýdany-Altai aýdany-Katonqaraǵai aýdany-Óskemen» baǵyty boiynsha júrgizildi.
«Monitoring barysynda Buqtyrma, Krasnoiarka, Glýbochanka ózenderiniń arnalary qaraldy. Aerovizýaldy zertteýler turaqty gidrologiialyq jaǵdaidy kórsetedi. Ózenderdegi sý deńgeii qaýipti shekten tómen», - deidi ShQO TJD tótenshe jaǵdailardyń aldyn alý basqarmasynyń bastyǵy Aleksei Shtykel.
Oblys aýmaǵynda qar eritin kezeń bastaldy. Óńirdiń qar basqan aýdany sońǵy 2 aptada 97% - dan 55%-ǵa deiin azaidy. Jer tońynyń joǵary qabatynyń erýi baiqalady. Sonymen qatar jer tońynyń bir metrden astam qatýy oblystyń 6 aýdanynda: Kúrshim, Katonqaraǵai, Besqaraǵai, Zaisan, Altai jáne Borodýliha aýdandarynda saqtalǵan.
Aita keteiik, oblystyń jazyq aýmaǵyndaǵy qar jamylǵysynyń biiktigi 50 sm-den aspaidy, tek Altai aýdanynda 75 sm. Sý tasqyny bolǵan jaǵdaida qalalar men aýdandardyń ákimdikteri 109,6 myń dana ydys-qap, 15,5 myń tonna inertti material, 532 tonna JJM daiyndaǵan.
