Shyǵys Qazaqstan oblysynyń politsiia 2021 jyldyń basynan beri qyzmettik itterdiń kómegimen 30-dan astam qylmysty ashty, dep habarlaidy "Ult aqparat".
ShQO Politsiia departamenti baspasóz qyzmetiniń málimetinshe, óńir politsiiasynda 80-nen astam it bar. Onyń ishinde 41 it izge túsý jumysyna, 14 it esirtki zattaryn tabýǵa, 13 it jarylǵysh zattardy izdeýge tartylady. Sonymen qatar shabýylǵa shyǵatyn – 2, kúzette - 5, iisterdi óte jaqsy ajyratatyn – 4 it saqshylarǵa kómek kórsetýde. Tórt aiaqty «politseiler» qylmys bolǵan jerlerge birge baryp, qylmyskerdi jyldam tabýǵa, jarylǵysh zattardy, esirtkiler men oq-dárilerdi izdeýge atsalysady.
«Sonymen qatar itter ártúrli kópshilik is-sharalar ótkiziletin jerlerde tártipti qamtamasyz etedi. Jedel tergeý tobynyń quramynda oblys boiynsha iz kesý jumysyna shyǵady. Jedel-izdestirý is-sharalaryn júrgizý kezinde Semei jáne Shemonaiha beketterinde táýlik boiy kezekshilikte bolady», - delingen habarlamada.
2021 jyly inspektor-kinologtar qyzmettik-izdestirý itterimen birge 900-den astam oqiǵa ornyna barǵan. Onyń ishinde esirtki qylmysyna qarsy is-qimyl baǵyty boiynsha – 43, jarylǵysh zattardy izdeýge – 345 ret tartyldy.
«Jyl basynan beri qyzmettik itterdiń kómegimen 32 qylmys ashyldy. Onyń ishinde esirtki zattardyń zańsyz ainalymyna bailanysty 16 qylmys boldy. Arnaiy operatsiialardy ótkizý kezinde zańsyz ainalymnan shamamen 500 gramm esirtki tárkilengen», - dedi ShQO PD kinologiialyq qyzmet ortalyǵynyń bastyǵy Ómirzaq Qasaiynov.
