Shyǵys Qazaqstannyń Besqaraǵai aýdanynda 2 úidi sý basyp, 13 aýla búlindi, dep habarlaidy QazAqparat tilshisi.
Aýdan ortalyǵy sanalatyn Besqaraǵai aýylynda Kýlikov kóline jaqyn úilerge qaýip tóngen. Aqpan aiynda ǵana ózen boiyndaǵy úilerdiń syrtynan inertti material tóselgen bolatyn. Alaida sý jer astynan shyǵyp, aýlalarǵa jaiylýda.
Qutqarýshylar 2 úidiń turǵyndaryn qaýipsiz jerge kóshirgen. Budan bólek 13 úidiń aýlasyna sý jaiylǵan. Tótenshe jaǵdai qyzmetkerleri jaiylǵan sýdy sorǵytyp jatyr.
«Besqaraǵailyq qutqarýshylarǵa Semei qalasynan qosymsha jasaq kómekke keldi. Qazirdiń ózinde 25 000 tekshe metr sý soryldy. Kýlikov kólinen shyqqan sýdy aýyldan shetkeri áketý jumystary júrip jatyr. Uzyndyǵy 150 metr bolatyn arna qazyldy. Óskemennen de Shyǵys óńirlik jedel aeroutqyr qutqarý jasaǵynyń toby attandy» - delingen tótenshe jaǵdailar departamenti taratqan aqparatta.
Departament deregine sensek, Krivnka, Semiiar aýyldaryna Ertis ózeninen de qaýip tónýi múmkin. Qutqarýshylar saqtyq úshin erteń ózenniń atalmysh aýyldarǵa jaqyn bóliginde muz jarý jumystaryn júrgizbek.
