شىعىس قازاقستاننىڭ بەسقاراعاي اۋدانىندا 2 ٷيدٸ سۋ باسىپ, 13 اۋلا بٷلٸندٸ, دەپ حابارلايدى قازاقپارات تٸلشٸسٸ.
اۋدان ورتالىعى سانالاتىن بەسقاراعاي اۋىلىندا كۋليكوۆ كٶلٸنە جاقىن ٷيلەرگە قاۋٸپ تٶنگەن. اقپان ايىندا عانا ٶزەن بويىنداعى ٷيلەردٸڭ سىرتىنان ينەرتتٸ ماتەريال تٶسەلگەن بولاتىن. الايدا سۋ جەر استىنان شىعىپ, اۋلالارعا جايىلۋدا.
قۇتقارۋشىلار 2 ٷيدٸڭ تۇرعىندارىن قاۋٸپسٸز جەرگە كٶشٸرگەن. بۇدان بٶلەك 13 ٷيدٸڭ اۋلاسىنا سۋ جايىلعان. تٶتەنشە جاعداي قىزمەتكەرلەرٸ جايىلعان سۋدى سورعىتىپ جاتىر.
«بەسقاراعايلىق قۇتقارۋشىلارعا سەمەي قالاسىنان قوسىمشا جاساق كٶمەككە كەلدٸ. قازٸردٸڭ ٶزٸندە 25 000 تەكشە مەتر سۋ سورىلدى. كۋليكوۆ كٶلٸنەن شىققان سۋدى اۋىلدان شەتكەرٸ ەكەتۋ جۇمىستارى جٷرٸپ جاتىر. ۇزىندىعى 150 مەتر بولاتىن ارنا قازىلدى. ٶسكەمەننەن دە شىعىس ٶڭٸرلٸك جەدەل اەروۇتقىر قۇتقارۋ جاساعىنىڭ توبى اتتاندى» - دەلٸنگەن تٶتەنشە جاعدايلار دەپارتامەنتٸ تاراتقان اقپاراتتا.
دەپارتامەنت دەرەگٸنە سەنسەك, كريۆنكا, سەمييار اۋىلدارىنا ەرتٸس ٶزەنٸنەن دە قاۋٸپ تٶنۋٸ مٷمكٸن. قۇتقارۋشىلار ساقتىق ٷشٸن ەرتەڭ ٶزەننٸڭ اتالمىش اۋىلدارعا جاقىن بٶلٸگٸندە مۇز جارۋ جۇمىستارىن جٷرگٸزبەك.
