Sheteldik jumys kúshin tartatyn kásiporyndarǵa ákimshilik jaýapkershilik belgilenedi.
Bul týraly QR Eńbek jáne halyqty áleýmettik qorǵaý ministrliginiń keńeitilgen alqa otyrysynda vedomstvo basshysy Birjan Nurymbetov aitty, dep habarlaidy QazAqparat.
Ministrdiń aitýynsha, Bas prokýratýramen birlesip sheteldik jumys kúshin tartatyn kásiporyndardy tekserý aiaqtalyp, qajetti ákimshilik sharalar qabyldandy.
«2020 jyly sheteldik jumys kúshin tartýǵa ruqsat berýdiń aldyn alý jáne tártibin kúsheitý úshin jumys berýshilerdiń qyzmetkerlerge teń sanitarlyq-turmystyq jaǵdai jasaý jónindegi mindetin jáne ákimshilik jaýapkershilikti belgileýdi josparlap otyrmyz. Táýekel dárejesin baǵalaý kriteriilerine jáne tekserý paraqtaryna ózgerister engiziletin bolady. Bul jyl saiyn qyzmetkerleriniń sany 250 adamnan asatyn, 30-dan astam sheteldik qyzmetkerdi tartatyn kásiporyndardy josparly tekserýlermen qamtýǵa múmkindik beredi», – dedi Birjan Nurymbetov.
Sondai-aq onyń atap ótýinshe, Halyqaralyq eńbek uiymynyń konventsiialaryna sáikes kásiporyndardy tekserýdi kedergisiz júzege asyrý, eńbek inspektorlarynyń shtat sanyn ulǵaitý bóliginde memlekettik eńbek inspektorlarynyń mártebesin qaita qaraý jóninde sharalar qabyldanady. Kásipodaqtardyń qyzmetin jetildirý, kásibi táýekelderdi baǵalaýǵa negizdelgen eńbekti qorǵaýdy basqarý jónindegi jańa tásilderdi engizý, sondai-aq qyzmetkerlerdiń eńbek qyzmetin tsifrlaýdy engizý jónindegi máselelerdiń úlken aýqymyn qamtityn eńbek jónindegi zań jobasy Parlament qaraýynda jatyr.
