Astanaǵa Qytai, Iran jáne TMD elderinen 80 týroperator kelip, «Astana Konvenshn biýrosynyń» uiymdastyrýymen ótken «Welcome to Astana» aqparattyq týry aiasynda sheteldik jáne otandyq týroperatorlardyń dialogtyq alańy quryldy.
Úsh kúnge sozylǵan «Welcome to Astana» aqparattyq týry aiasynda sheteldik meimandar Kerei – Jánibek handardyń, Kenesary hannyń eskertkishine, sonymen qatar «Barys Arena», Nazarbaev ýniversiteti jáne basqa da Astananyń kórikti jerlerine ekskýrsiia jasady. Sol siiaqty shahardaǵy zamanaýi tehnologiiamen joǵary deńgeide qyzmet kórsetetin aýrýhanalardyń da jumysymen tanysqan sheteldik týroperatorlar dóńgelek ústelde otandyq operatorlarmen bas qosyp, jaqyn qarym-qatynas ornatyp, birqatar kelisimge keldi.
– «Welcome to Astana» aqparattyq týrynyń alǵashqy eki kúninde biz Astanadaǵy qonaq úilerdi, meditsinalyq, ǵylymi, bilim, sport, mádeni nysandardy araladyq. Qazaqstan astanasynyń «Báiterek», «Nur-Álem» siiaqty biregei ǵimarattarynda boldyq. Negizi Astana sheteldik týrister úshin qyzyǵa qaraityn qalaǵa ainalyp otyr. Sondyqtan biz de óz týristerimizdi osynda jiberýge múddelik tanytamyz. Týrizm salasy birlesken jumysty talap etedi. Ol qalalar, elder arasyndaǵy dostyqty nyǵaityp, adamdardy jaqyndastyrady, – deidi reseilik ekskýrsiia jetekshisi Vera Popovich.
Jiyn barysynda «Astana Konvenshn biýro» JShS-tiń bas menedjeri Ásel Qarbaeva qazirgi tańda Astanada týrizm salasynyń túrli baǵyttaryn damytý sharalary qolǵa alynyp otyrǵanyn aitty.
– Astanada týrizmdi damytýdyń múmkindigi mol. Bul turǵyda qalanyń áleýeti de aýyz toltyryp aitarlyqtai. Óitkeni búginde kóptegen álem elderi elordamyz Astanany beibitshilikke bastaityn ortaq pikir alańy retinde tanidy. Halyqaralyq forýmdar, konferentsiialar siiaqty jáne basqa da aýqymdy sharalarǵa sheteldik mártebeli meimandar kóptep keledi. Sol siiaqty álemge tanymal mamandardyń sheberlik sabaqtaryna qatysqysy keletinder taǵy bar. Týrizmniń atalmysh baǵytyn damytý jumystaryna aldaǵy ýaqytta kóp kóńil bólinetin bolady, – deidi Ásel Qarbaeva.
Jiyn barysynda Astana qalasynyń áýejaiynan álemniń birqatar iri qalalaryna tikelei jóneltiletin halyqaralyq áýe reisteriniń kóbeigenin tilge tiek etken «Qazaqtýrizm» UK» AQ marketing jáne RR departamentiniń bas menedjeri Daniel Serjanuly sheteldik týroperatorlarǵa aldaǵy ýaqytta Astanadan bólek Býrabai, Baianaýyl siiaqty Qazaqstannyń birqatar tabiǵaty tamasha jerlerine barýdy usyndy. Al óz kezeginde Aqmola oblystyq týrizm basqarmasy janyndaǵy Týristik aqparattyq ortalyǵynyń jetekshisi Daniiar Idiiatov:
– Astanaǵa kelgen týristerdi 250 shaqyrym qashyqtyqta ornalasqan Býrabaiǵa shaqyrar edim, ólkeniń ǵajaiyp tabiǵaty olardy tamsandyrmai qoimaitynyna senimdimin. 2010 jyly avtoban salynǵan bolatyn. Avtokólikpen esh kedergisiz jyldam jetip barýǵa bolady. Jalpy, týroperatorlarǵa bizdiń Býrabai jaqta qyzyqty bolady dep oilaimyn, – dei kele, sheteldik týroperatorlarmen osyndai júzdesý uiymdastyrǵany úshin Astana qalasynyń ákimdigi men «Astana Konvenshn biýrosyna» zor rizashylyǵyn bildirdi.
Jalpy, týrǵa qatysqan sheteldik týroperatorlar Qazaqstan elordasy – Astana búgingi tańda álemdegi týristik turǵyda tartymdy qala bolyp otyrǵanyn alǵa tartady. Olai bolsa, biz de bas qalamyzǵa kelýge niettengen qonaqtarǵa «Welsome to Astana» demekpiz.
Nurdáýlet KÁKIShEV
