Memlekettik kirister komitetinde halyqaralyq poshta jóneltilimderiniń salmaǵy men quny boiynsha qandai shekti mólsheri belgilengenin eske saldy. Eger bul jóneltilim shekti mólsherden aspasa, kedendik deklaratsiiany tapsyrýdyń qajeti joq, dep habarlaidy QazAqparat komitettiń baspasóz qyzmetine silteme jasap.
Komitettiń túsindirýinshe, QR Keden kodeksiniń 3-baby 1-tarmaǵynyń 57-tarmaqshasyna sáikes halyqaralyq poshta jóneltilimderi - Dúniejúzilik poshta odaǵynyń aktilerine sáikes poshta almasý obektileri sanalady, EAEO kedendik aýmaǵynyń sheginen tys halyqaralyq poshta almasý oryndarynan, nemese EAEO kedendik aýmaǵyna halyqaralyq poshta almasý mekemelerine túsedi ne EAEO kedendik aýmaǵy arqyly tranzitpen ótetin sálemdemeler men jazbasha hat-habar Dúniejúzilik poshta odaǵynyń aktilerinde kózdelgen qujattarmen alyp júriledi.
«Halyqaralyq poshta jóneltilimderimen jiberiletin jeke paidalanýǵa arnalǵan taýarlardy EAEO keden shekarasy arqyly ótkizý tártibi Eýraziialyq ekonomikalyq odaq Keden kodeksiniń 37 jáne 40-taraýlarymen, kodekstiń 39 jáne 42-taraýlarynda, №107 sheshimde, «Dúniejúzilik poshta odaǵynyń aktilerinde kózdelgen qujattardy kedendik deklaratsiia retinde paidalaný tártibi týraly nusqaýlyqty bekitý týraly» Keden odaǵy komissiiasynyń 2010 jylǵy 18 maýsymdaǵy №310 sheshiminde aiqyndalǵan.
Halyqaralyq poshta jóneltilimderimen jiberiletin jeke paidalanýǵa arnalǵan taýarlarǵa qatysty kedendik operatsiialar halyqaralyq poshta almasý oryndarynda (Qazaqstan Respýblikasy Aqparat jáne kommýnikatsiialar ministriniń 2016 jylǵy 9 jeltoqsandaǵy №277 buiryǵymen aiqyndalǵan) ne keden organy aiqyndaǵan ózge de oryndarda jasalady», delingen habarlamada.
Halyqaralyq poshta jóneltilimimen jiberiletin jeke paidalanýǵa arnalǵan taýar jolaýshynyń kedendik deklaratsiiasyn qoldana otyryp, kedendik deklaratsiialaýǵa jatady.
«Halyqaralyq poshta jóneltilimderinde ótkiziletin jeke paidalanýǵa arnalǵan taýarlardy kedendik deklaratsiialaý, jeke paidalanýǵa arnalǵan taýarlardy jóneltýshi nemese alýshy bolyp tabylatyn jeke tulǵa turaqty nemese ýaqytsha turatyn ne ýaqytsha bolatyn EAEO-ǵa múshe memlekette júzege asyrylady.
Zaǵiptarǵa arnalǵan aerogrammalar, hattar, poshta kartalary jáne jóneltimder kedendik deklaratsiiasyz jáne kedendik rásimderge ornalastyrýsyz keden organynyń ruqsatymen EAEO kedendik shekarasy arqyly ótkiziledi.
Halyqaralyq poshta jóneltilimderimen jiberiletin jeke paidalanýǵa arnalǵan taýarlardy shyǵarýdy keden organy kedendik bajdar, salyqtar tólengenge deiin júrgizedi», delingen habarlamada.
Komitettiń málimetinshe, quny 200 eýrodan asatyn nemese salmaǵy 31 keliden asatyn taýarlarǵa shetelden tapsyrys bergen kezde, qun sheginen asyp ketý bóliginde, normadan 15% mólsherinde, biraq 1 keli úshin 2 eýrodan kem emes baj tólenýi kerek, mysaly, eger pakettiń quny 300 eýro, al salmaǵy 31 keli bolsa, onda baj 100 eýroǵa tólenýi kerek, bul 15 eýro. Salmaq bóliginen asyp ketken kezde, mysaly, eger sálemdemeniń salmaǵy 35 keli bolsa, baj salmaq sheginen (iaǵni 4 kg-nan) asyp, 8 eýrony quraidy.
«Baj alý úshin negiz retinde 2020 jylǵy 1 qańtardan bastap taýarlardy ótkizý jiiligin esepke almaǵanda, árbir jeke selemdeme salmaǵy men quny qaralady. Jeke paidalanýǵa arnalǵan taýarlardyń qunyna olardy tasymaldaý jáne saqtandyrý jónindegi shyǵystar engizilmeidi.
Eger jóneltilimniń salmaǵy men quny shekti mólsherden aspasa, kedendik deklaratsiiany tapsyrýdyń qajeti joq.
Jolaýshylar kedendik deklaratsiiasyn eektrondy túrde tapsyrýǵa bolady. Ondai múmkindik «ASTANA-1» aqparattyq júiesinde júzege asyrylǵan, júiede EAEO shekarasynan ótkenge deiin jolaýshylar kedendik deklaratsiiasyn usynýǵa bolady», delingen habarlamada.
«ASTANA-1» júiesinde jolaýshylar kedendik deklaratsiiasyn tapsyrý úshin jeke tulǵalarǵa mynalar qajet: turǵylyqty jeri boiynsha Memlekettik kirister departamentine ótinish joldaý arqyly login men qupiiasóz alý; jeke basyn sáikestendirý úshin ETsQ.
