«Otandastar qory» kommertsiialyq emes aktsionerlik qoǵamy sheteldegi qandastarǵa Qazaq kartasy Qazaqstannyń basqa memleketterdegi elshilikteri arqyly berýdi usyndy, dep habarlaidy QazAqparat.
«Qazaq kartasynyń usyný tártibi boiynsha taǵy bir máseleni aita keteiin. Mysaly, biz Polsha memleketiniń tájiribesin zerttedik. Ol eldiń tájiribesi boiynsha, Polsha memleketiniń sheteldegi elshilikteri tarihi Otanyna oralǵysy keletin poliaktarǵa osyndai kartany berýmen ainalysady. Ol karta tegin beriledi. Osyǵan orai, zań jobasy boiynsha Qazaq kartasyn berýdi Qazaqstan Respýblikasynyń sheteldegi mekemeleri arqyly berýdi usynyp otyrmyz», - dedi «Otandastar qory» KEAQ vitse-prezidenti Maǵaýiia Sarbasov elordada «Sheteldegi otandastardy memlekettik qoldaý týraly» QR zań jobasyn talqylaý barysynda.
Onyń aitýynsha, Qazaq kartasyn alýdyń búgingi tańda birshama sharttary ázirlengen.
«Birinshi – qazaq ultyna jatatyn nemese Qazaq KSR-nyń, QR-nyń burynǵy azamattyǵyn rastaityn qujattyń bolýy. Ekinshiden, qazaq tiliniń bazalyq deńgeiin bilý. Úshinshisi - qazaq mádenieti, salt-dástúri men ádet-ǵurpy týraly negizgi bilimderin meńgerýi. Memlekettik organdardyń usynysymen Qazaq kartasynyń jaramdylyǵy 10 jyldan 5 jylǵa qysqartyldy», - dedi Maǵaýiia Sarbasov.
Sheteldik qazaqtardyń Qazaqstan aýmaǵynda el azamattarymen birdei quqyqqa ie bolýyna múmkindik beretin «Qazaq kartasy» atty qujattyń jobasy daiyndalyp jatqany buǵan deiin habarlanǵan bolatyn.
«Otandastar» qorynyń prezidenti Nurtai Ábiqaevtyń aitýynsha, «Qazaq kartasy» dep atalatyn qujat sheteldik qazaqtardyń tarihi Otanynda ýaqytsha ómir súrip, beiimdelýi úshin jasalmaq.
«Shetelderdegi qazaqtardy qoldaýǵa baǵyttalǵan zań qabyldanady. Sonyń aiasynda «Qazaq kartasy» degen qujat jasalýy múmkin. Ol qujat syrttaǵy qazaqtarǵa qazaqstandyqtarmen birdei ómir súrýge múmkindik týǵyzady. Iaǵni, bilim alý, dárigerge qaralý, biznespen ainalysý, jumys isteý siiaqty barlyq ómir aspektilerinde Qazaqstan azamattarymen birdei quqyqqa ie bolady. Tek saiasatpen ainalysýǵa bolmaidy. Ol úshin azamattyq alýy qajet. «Qazaq kartasy» qolynda bar qazaq otbasymen bizdiń elde eshqandai vizasyz júrip-tura alady», - degen edi Nurtai Ábiqaev.
