Shetelde turatyn qandastar Qazaqstannyń Mańǵystaý oblysynda bolyp, birqatar kieli oryndardy aralady.
Aqparat jáne qoǵamdyq damý ministrliginiń qoldaýymen júzege asqan sharany «Otandastar Qory» KEAQ jáne Dúniejúzi qazaqtary qaýymdastyǵy birlese uiymdastyrdy, dep habarlaidy "Ult aqparat".
«Sheteldegi qazaqtar kieli oryndardy aralap qana qoimai, ár elden kelgen jastar ózara tanysyp, olardyń arasyndaǵy dostyǵynyń nyǵaiýyna dáneker bolý maqsat etilgen edi. Osyndai maqsat aiasynda shetelde ómir súrip jatqan qazaq jastary arasyndaǵy Jas Otandastar klýbyn qurý da josparlandy. Onyń maqsaty qazaq halqynyń mádeni jáne rýhani qundylyqtaryn saqtaý, Qazaqstannyń kieli oryndaryn shetelde dáripteý, álemge taratý», - delingen baspasóz baianynda.
Atalmysh sharaǵa Ózbekstan, Resei, Qytai, Mońǵoliia, Iran, Túrkiia memleketterinen kelgen 20 qandasymyz qatysty.
Aita keterligi, jyl saiyn dástúrli túrde ótetin «Kieli Qazaqstan» jobasynyń kezekti kezdesýi erkin formatta ótti. Ár elden kelgen, ár salanyń ókili sanalatyn qazaq jastary ózara pikir almasyp, shettegi basqa da otandastarǵa ulttyq qundylyqty tereńinen nasihattaý jaiynda sóz boldy.
Kezdesý barysynda Iran memleketinen kelgen bolashaq ustaz Shahire Qazaq ózi turyp jatqan elde qazaq tilin tolyqqandy meńgerýge múmkindik joq ekenin aitady. Bul rette «Otandastar Qory» KEAQ qazaq tilin úirenýge arnalǵan onlain klass ashý jumysy qolǵa alynǵanyn jetkizdi. Al Ózbekstannan kelgen Gúldana Tórehanqyzy ulttyq oiyndardy dáripteitin is–sharalar kóbirek ótkizilse degendi alǵa tartady.
Onyń aitýynsha, ulttyq oiyndar arqyly da qazaqi bolmysty saqtap qalýdyń múmkindigi zor. Júzdesýde qandastar sheteldegi ózderiniń jumysy, kásibi týraly aitty.
Budan keiin qonaqtar Mańǵystaý óńirine saparlap, onda óńirdegi kieli oryndarǵa táý etti.
Aita keteiik, Mańǵystaý oblysynda 362-ge jýyq tarihi eskertkish bar. Solardyń biri - áigili Beket Ata kesheni.
«Birqatary Qazaqstanǵa alǵash ret qadam jasap otyrǵan qandastar Mańǵystaý óńirinde eskertkishter tarihymen tanysyp áýlie rýhyna quran baǵyshtady. Beket ata jaily túrli ańyz-áńgimeler estip tarih taǵlymyna tańdanystaryn jasyrmady», - delingen baspasóz baianynda.
