Foto: stan.kz
Elimizdiń Syrtqy ister ministrligi tabys tabý maqsatymen shetelde quldyqqa túsken qazaqstandyqtar týraly pikir bildirdi, dep habarlaidy QazAqparat agenttigi.
«Ońtústik-Shyǵys Aziiada bizdiń eki azamatymyz eńbek quldyǵyna tap bolǵan. Olar ótken jyly jeltoqsannyń sońynda Tailandtaǵy elshilik arqyly bailanysqa shyqty. Joǵalǵan azamattardyń ata-anasy bizge habarlasyp kómek surady. Bul alǵash jaǵdai emes. Birneshe ai buryn taǵy bir azamatymyz osyndai jaǵdaiǵa tap bolǵan edi. Biz onyń elden shyǵýyna kómektestik», - dedi QR Syrtqy ister ministrliginiń resmi ókili Aibek Smadiiarov Úkimet úiinde tilshilerdiń saýalyna jaýap bere turyp.
Onyń aitýynsha, shetelde joǵalǵan azamattardy izdeý jumysyna memlekettik organdarmen qatar úkimettik emes uiymdar da tartylady.
«Onda tek Qazaqstan emes, basqa elderdiń de azamattary bar. Sondyqtan máseleni keshendi túrde sheshý qajet. Eki azamat boiynsha másele Tailandtaǵy elshiliktiń baqylaýynda. Olar byltyr konsýlǵa habarlasqan. Alaida qazir joǵalǵan eki azamattan habar joq, másele oń sheshimin tabady dep oilaimyn. Osy oraida shetelge tabys izdep baratyn azamattardy barynsha abai bolýǵa shaqyramyz. Jumysqa barmas buryn kelisimshartpen muqiiat tanysqan abzal. Bul - azamattardyń jeke jaýapkershiligi», - deidi ol.
