Almaty qalasynyń mádeniet basqarmasy biýdjetten qazaqstandyq estrada juldyzdarynyń jeke kontsertterin ótkizýge nelikten 220 mln teńgeden astam qarajat bólinetinin túsindirdi. Onyń ishinde Roza Rymbaevanyń mereitoilyq keshine jumsalatyn 111 mln teńge de bar, dep habarlaidy Ulysmedia.kz.
Sheneýnikterdiń sózinshe, jariialanǵan smetalar – kommertsiialyq qurylymdar men óner ieleriniń ózderi usynǵan esepteýlerdiń bir ǵana nusqasy.
"Almaty qalasynda Roza Rymbaeva, Marat Bisenǵaliev jáne Jámila Serkebaevanyń kontsertterin uiymdastyrýǵa qatysty áleýmettik jelilerde talqylanǵan esepter, bul máslihattyń jumys toptary men sessiialarynda, sondai-aq Qoǵamdyq keńestiń otyrystarynda qaralǵan "jumys materialy". Talqylaý barysynda olar usynystar men eskertýler negizinde ózgeristerge ushyrady. Qabyldanǵan sheshim boiynsha Jámilá Serkebaevanyń kontsertine biýdjetten qarajat bólinbeitin boldy. Jeke kontserttiń jarnamalyq naýqany úshin aqsha da bólinbeidi", – dep túsindirdi baspasóz qyzmeti.
Sonymen qatar, ákimdiktegiler festivalder — Almaty tirshiliginiń dástúrli bóligi ekenin atap ótip, óner qairatkerleriniń bastamalaryn qoldaǵan jón dep jaýap berdi.
"Almatyda kontsertter men festivalderdi ótkizý – qala ómiriniń dástúrli ári mańyzdy bóligi. Pandemiiaǵa bailanysty eki jyldyq shekteýlerden keiin óner qairatkerleriniń bastamalaryn qoldaý mańyzdy", – dedi qalalyq mádeniet basqarmasy.
Eske sala ketsek, budan buryn almatylyq bloger Erlan Nurpeiisov Almaty ákimdiginiń mádeniet basqarmasy boiynsha osy jylǵa arnalǵan biýdjet jobasynda Roza Rymbaevanyń esep berý keshine 111 mln teńge bólý kózdelgeni jaily jazǵan bolatyn.
