Elordanyń bas memlekettik sanitarlyq dárigeri Sarhat Beisenova Memleket basshysy Qasym-Jomart Toqaevtyń shekteýler men reidter kútilgen nátije ákelmei otyr degen málimdemesine qatysty pikir bildirdi, dep habarlaidy QazAqparat.
Memleket basshysy elimizdegi koronavirýs indetine bailanysty epidemiologiialyq ahýal jónindegi keńeste shekteý sharalary men reidter kútken nátijege jetkizip otyrmaǵanyn aitqan bolatyn. Osy máselege qatysty pikir bildirgen Sarhat Beisenova munyń barlyǵy halyqtyń shekteý is-sharalaryn qalai saqtaityndyǵyna jáne kásipkerlerdiń jaýapkershiligine bailanysty ekendigin aitady.
«Iaǵni, biz usynǵan naqty rejimder saqtalǵan jaǵdaida epidemiologiialyq jaǵdaidyń belgili bir deńgeide jaqsara túskenin barlyq ýaqytta baiqaimyz. Biraq, oǵan ýaqyt kerek ekeni sózsiz. Eki aptalyq inkýbatsiialyq kezeńdi qadaǵalap otyramyz. Eger buzýshylyqtar oryn alǵanyn baiqasaq, onda munan úlken nátije kóre almaimyz. Degenmen, belgili bir nysanda uzaq ýaqyt shekteý is-sharalaryn qabyldaityn bolsaq, sol kezde bailanysta bolǵan adamdar arasyndaǵy naýqastanýdyń tómendegenin kóremiz»,- dedi bas sanitarlyq dáriger.
Al Nur-Sultan qalalyq politsiia departamenti Jergilikti politsiia qyzmetiniń basshysy Arman Aitmaǵambetov kásipkerlik sýbektilerin tekserý irikteý arqyly júrgizilmeitindigin aitady.
«Qala turǵyndarynan 102 arnasy, áleýmettik jeliler, messendjer chattary arqyly belgili bir kóńil kóterý ornynyń karantin rejimin buzǵany týraly habarlama túsedi. Soǵan orai áreket etip, karantin rejiminiń buzylýyn tekseremiz», - dedi Arman Aitmaǵambetov.
