Sharyn shatqalynda lai-sel kóshkini júretindigi týraly nelikten aldyn ala eskertý jasalmady? Bul saýalǵa QR TJM Azamattyq qorǵanys jáne áskeri bólimder komitetiniń tóraǵasy Baýyrjan Syzdyqov jaýap berdi, dep habarlaidy QazAqparat.
«Sharyn shatqaly jáne onyń sai-salasy sel júrý qaýpi bar aimaq ekendigin túsinýge tiispiz. Sol aýdanda TJM-ǵa qarasty «Qazseldenqorǵaý» mekemesiniń bólimshesi joq. Osy kúnderdiń ishinde Qazgidrometten Almaty qalasy jáne Almaty oblysynyń tótenshe jaǵdailar departamentterine qandai da bir sel júretindigi týraly daýyldy eskertý bolǵan emes», - dedi komitet tóraǵasy Ortalyq kommýnikatsiialar qyzmetindegi baspasóz máslihaty barysynda BAQ ókilderiniń saýalyna orai.
Onyń atap ótýinshe, nóser jaýynnyń saldarynan laily sel júrip ótken. Sonymen qatar ol Sharyn shatqaly aýmaǵyndaǵy uialy bailanystyń nasharlyǵyna qatysty saýalǵa jaýap berdi.
«Uialy bailanysqa qatysty aitar bolsam, bizde taýly jerlerde bailanys bola bermeidi. Muny biz túsinýge tiispiz. Týristerdiń mindetti saqtandyrý týraly zańǵa sáikes, týristik operator jumys jasaýy kerek», - dedi Baýyrjan Syzdyqov.
Esterińizge sala ketsek, Almaty oblysynyń Sharyn shatqalynda sel júrip, 2 adam mert boldy. 6 adam zardap shekti.
Bir oqýshy qyzdy sel aǵyzyp áketip, ony birneshe saǵattan keiin qutqarýshylar aman-esen taýyp aldy.
