Foto: primeminister.kz
Tótenshe jaǵdailar ministri Syrym Sháriphanov el aýmaǵyndaǵy hostelder men jataqhanalardaǵy qaýipsizdik jaǵdaiyn qadaǵalaýǵa qatysty túsinik berdi, dep habarlaidy Kazinform.
«Jataqhanalardyń ózindik klassifikatsiiasy bar. Bul rette osy nysandar úsh tipke bólinedi. Joǵary, ortasha, tómen táýekeldegi nysandar bolyp jikteledi. Biz turǵyndar sany 2 myńnan astam joǵary táýekeldegi jataqhanany tekseremiz, tiisti jospar boiynsha bul jumystar atqarylyp jatyr. Shaǵyn jáne orta bizneske qysym bolmaýy úshin bizde basqa kategoriialar qamtylmaǵan. Sol sebepti bul máseleni basqa jolmen sheship jatyrmyz, iaǵni barlyq jataqhanalar (shaǵyn nysandar) men hostel boiynsha «Jataqhana» aktsiiasyn uiymdastyrdyq. Bul turǵyda bizdiń mamandar men ishki ister organdarynyń ókilderi birlese atalǵan nysandardy aralap, órt qaýipsizdigin túsindirip jatyr», - dedi Sháriphanov Senattaǵy parlamenttik tyńdaýdan keiin tilshiler suraǵyna jaýap bere otyryp.
Sonymen qatar tilshiler jeke turǵyn úilerdiń aýmaǵynda ruqsatsyz salynǵan jataqhanalardy tekserý múmkindigine qatysty suraq qoidy.
«Osyndai nysandarda órt qaýipsizdigi jaǵdaiyn qadaǵalaý turǵysynda memlekettik organda belgili bir qiyndyqtar bar. Órt qaýipsizdiginiń qyzmetkerleri jekemenshik nysandarǵa tikelei baryp, teksere almaidy. Tekserýler tek táýekeli joǵary nysandarda ǵana iske asyrylady jáne tiisti bekitilgen erejege sáikes atqarylady. Atap aitqanda, turǵyn úilerdi, kottedjderdi hostelge ainaldyrý arqyly keibir turǵyndar osydan tabys alyp otyr. Ókinishke qarai, mundai nysandar kún saiyn kóbeiip keledi. Qaýipsizdik erejeleri saqtalmaǵandyqtan, olar turǵyndardyń densaýlyǵy men ómirine qaýip tóndiredi. Sondyqtan Ónerkásip jáne qurylys ministrligimen birlese tiisti jumystardy bastap kettik. Sebebi adamdar eshbir ruqsat qujattarynsyz óz erkimen nysandardy basqa maqsatta paidalanyp jatyr. Al shaǵym bolmasa, osyndai ǵimarattardy tekserý qiynǵa túsedi. «Jataqhana» aktsiiasy aiasynda osyndai hostelderdi qamtýǵa tyrysyp jatyrmyz», - dedi vedomstvo basshysy.
Aita keteiik, qazir el óńirlerinde «Jataqhana» aktsiiasy ótip jatyr. Bul rette órt qaýipsizdigi erejelerin saqtaý máselesine erekshe nazar aýdarylǵan. TJ departamenti qyzmetkerleri, politsiia, jergilikti atqarýshy organdar men eriktiler arasynan mobildi toptar qurdy. Profilaktikalyq is-sharalar barysynda elektr symdarynyń, gaz, jylytý jáne elektrmen jylytý peshteriniń jai-kúiine, sondai-aq evakýatsiialaý joldaryna erekshe nazar aýdarylady.
