«Nexia» markaly avtokólikpen kelgen qaraqshylardyń qolynda sýyq qarý bolǵan, dep habarlaidy QazAqparat.
Betine meditsinalyq betperdeni búrkep, qolyna pyshaq, eki aýyzdyq ańshy myltyǵyn, aǵash shoqpar (dýbinka) ustaǵan úsh kúdikti janarmai beketindegi kassaǵa basa kóktep kirgen.
Olar kassir men onyń kómekshisin qorqytyp, aqsha talap etip, kassadaǵy 120 myń teńgeni alyp ketken.
Keiin beket mańynda kólikte tosyp turǵan tórtinshi sybailasymen birge boi tasalaǵan.
Shardara men Jetisai aýdanynyń politseileri qylmyskerlerdiń izine túsip, nátijesinde kúdiktiniń ekeýin qolǵa túsirdi.
«Qylmys túngi ýaqytta bolǵandyqtan kórgen-bilgen kýágerler joq. Oǵan qosa kúdiktiler jedel qimyldap, qashyp úlgergen. Bizge habar kelisimen olardyń áreketin saraladyq. Eki aýdannyń politseileri birlese otyryp, qaraqshylardyń kóligin oqiǵa ornynan 40 shaqyrym qashyqta ornalasqan Jetisai aýdanyndaǵy aýyldarynyń birinen toqtatty. Qyzmettik kólikpen sońynan jetken politseilerdi kórgen qaraqshylar kólikti tastaǵan kúii qashýǵa áreket etken. Alaida politseilerdiń kásibi sheberligi nátijesinde, kúdiktiniń ekeýi dál sol sátte ustaldy», - dedi Túrkistan oblysy politsiia departamenti bastyǵynyń orynbasary, politsiia podpolkovnigi Qurmanbek Sahov.
Qazir eki kúdikti qamaýda. Al boi tasalap ketken eki sybailasy izdestirilip jatyr.
