Almaty oblysy Shamalǵan stansasynda temirjol ústinen ótetin kópir salynyp jatyr, dep habarlaidy QazAqparat.
«QazAvtoJol» ulttyq kompaniiasy AQ «Ortalyq-Ońtústik» baǵytyndaǵy Nur-Sultan – Qaraǵandy – Balqash - Priozersk – Býrylbaital - Shý – Almaty aimaqtaryndaǵy joldardyń salyný barysyn tanystyryp, kórsetý maqsatynda baspasóz týryn uiymdastyrdy.
Sonyń barysynda Almaty oblysy Shamalǵan stansasyndaǵy temirjol boiyndaǵy kópir qurylysynyń jumysy tanystyryldy.
«Biz qazir Shamalǵanda turmyz. Bul jerde jol qurylysy jumysy qyzý júrip jatyr. Oqiǵany áriden bastasaq, osydan 2 jyl buryn osy stansanyń temirjol ótkelinde poiyz ben avtobýs qaqtyǵysyp, kólik apaty bolǵan edi. Sodan keiin joldy qaita salý máselesi qaralyp, qazir jańa temirjol kópiri salynyp jatyr. Salynyp jatqan joldyń jalpy uzyndyǵy 6 shaqyrymdy, al kópirdiń uzyndyǵy 350 metrdi quraidy», - dedi «QazAvtoJol» ulttyq kompaniiasy AQ Almaty oblystyq filialynyń basshysynyń mindetin atqarýshy Bolatbek Aitbaev.
Onyń aitýynsha, temirjoldyń ústinen kópir salý jolaýshylar jáne temirjol qyzmeti úshin de oń sheshim.
«Endigi ýaqytta jaiaý júrginshiler, kólik jáne poiyz bir-biriniń qatanysyna kederdi keltirmeidi. Bastysy qaýipsizdikti qamtamasyz etý. Bul jerden kúnine 50 myńnan astam kólik ótedi. Kópir qurylysyn 250-den astam maman jáne 128 tehnika jumyldyryldy. Jobany jyldyń sońyna deiin aiaqtap, halyqtyń igiligine berý jospary tur», - deidi ol.
Eske sala ketsek, 2019 jyldyń qyrkúiek aiynda Shamalǵan stansasynda poiyz ben avtobýs soqtyǵysyp, jol apaty boldy. Jolaýshylar avtobýsy relske shyǵyp ketken. Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bólimine jatqyzylǵan edi.
Qaiǵyly oqiǵadan soń Memleket basshysy Qasym-Jomart Toqaev japa shekkenderdiń týǵan-týystaryna kóńil aitty.
