Shaǵyn jinaqtalǵan mektep pedagogterine eńbekaqy tóleý júiesi ózgertiledi. Bul týraly búgin Úkimet otyrysynda QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Taǵy bir mańyzdy másele - qalalyq jáne aýyldyq mektep arasyndaǵy bilim sapasyndaǵy alshaqtyqty azaitý. PISA derekteri boiynsha qazirgi ýaqytta alshaqtyq 1,5 jyldy quraidy. Bul alshaqtyqty qysqartý úshin keshendi sharalar qabyldandy. Eń bastysy bilikti pedagogtermen qamtamasyz etý úshin shaǵyn jinaqtalǵan mektep pedagogterine eńbekaqy tóleý júiesi ózgertiledi jáne aýyldyq mektepterdi oqý materialdarymen, kompiýterlik jabdyqtarmen jáne tsifrlyq tehnikamen, tsifrlyq resýrstarmen tolyǵymen qamtityn bolamyz. Bul maqsatta respýblikalyq biýdjetten 150 mlrd teńge arnaiy qarastyrylyp otyr», - dedi 2025 jylǵa deiin Qazaqstanda bilim men ǵylymdy damytýdyń memlekettik baǵdarlamasyn tanystyrǵan Ashat Aimaǵambetov.
Ministrdiń aitýynsha, álemdik tájiribege sáikes bilim sapasyn arttyrýda baqylaýdyń orny erekshe. Endi syrtqy baqylaý tek qana kemshilikti tabý emes, onyń aldyn alý jáne joiý úshin ádistemelik kómek berýge baǵyttalatyn bolady.
«Osy tusta baqylaýdyń jańartylǵan jańa júiesin engizemiz. Ýniversiteterge, kolledjderge qoiylatyn talaptardy kúsheitemiz dep tiisti normativtik-quqyqtyq qujattardy qabyldaimyz», - dedi ol.
