Almaty oblysynyń taýlarynda, Severtsev muzdyǵy mańynan tabylǵan belgisiz adamnyń máiiti taýdan evakýatsiialandy. Qutqarý jumystaryna tikushaq jumyldyryldy, dep habarlaidy ult.kz.
Tótenshe jaǵdailar ministrliginiń málimetinshe, Talǵar aýdanyndaǵy Severtsev muzdyǵy mańynda, shamamen 3400 metr biiktikte týrister aty-jóni ázirge anyqtalmaǵan adamnyń denesin baiqap, bul týraly qutqarýshylarǵa habarlaǵan.
Oqiǵa ornyna jetken TJM qutqarýshylary máiitti taýdyń jetýi qiyn ýchaskesinen alyp shyqty. Qutqarý jumystary barysynda «Qazaviaqutqarý» AQ-nyń tikushaǵy paidalanyldy.
Evakýatsiiadan keiin máiit Almaty oblysynyń jedel-tergeý tobyna tapsyryldy. Qazir qaza tapqan adamnyń jeke basy men óliminiń mán-jaiy anyqtalyp jatyr.
Osyǵan bailanysty TJM taýǵa shyǵatyn týristerge qaýipsizdik sharalaryn qatań saqtaýdy eskertti. Mamandar joryq aldynda marshrýtty muqiiat zerttep, aýa raiyn eskerip, ózderiniń fizikalyq daiyndyǵyn obektivti baǵalaýǵa shaqyrady.
Sondai-aq týrister josparlanǵan marshrýt pen qaitý ýaqytyn jaqyndaryna aldyn ala habarlap, bailanys quraldary men qajetti jabdyqtardy alyp júrýi kerek. Tótenshe jaǵdai bolǵan jaǵdaida 112 nómirine dereý habarlasý qajet.
