QR Eńbek jáne halyqty áleýmettik qorǵaý ministri Serik Shápkenov eńbek naryǵyndaǵy jańa boljamdar týraly aityp berdi, dep habarlaidy QazAqparat.
«Pandemiia men jańa demografiialyq ahýal eńbek naryǵynda júieli jumysty qajet etetin jańa talaptar qoiýda. Birinshiden, jumys kúshine qoiylatyn talaptardyń tez ózgerýi. Sarapshylardyń pikirinshe aldaǵy 5 jylda jumys kúshine qajetti negizgi daǵdylardyń 40 paiyzy ózgeredi, árbir ekinshi qyzmetkerge qaita daiarlaýdan ótý qajettigi týyndaidy. Ekinshiden, demografilyq qaterler. Ónerkásip salasynda kadrlardyń qartaiý protsessi júrip jatyr. Bul salada jastardyń tek 20 paiyzy jumyspen qamtylǵan», - dedi Eńbek ministri Úkimet otyrysynda.
Úshinshiden, ministr jumystyń jańa formattaryn atap ótti. Qazirgi ýaqytta «erkin tabys ekonomikasy» nemese gig-ekonomika, frilanserler qarqyndy damýda. Olardyń qyzmetin zańnamalyq retteý jáne eńbek quqyqtaryn qorǵaý sharalar qabyldaý qajet.
«Osy rette, ministrlik «Kásiptik biliktilik týraly» zań jobasy, «Áleýmettik kodeks» jobasy sheńberinde Ulttyq biliktilik júiesin damytý, jumys kúshin kásiptik oqýdan ótýge yntalandyrý boiynsha birqatar bastamalar qolǵa aldy. Elektrondy eńbek birjasy negizinde onlain oqý portalyn damytý, kásiptik baǵdarlaý, ikemdi jumys formasyndaǵy qyzmetkerlerdi qoldaý boiynsha elektrondy servisterdi qurý boiynsha jumystar atqarylýda», - dedi S. Shápkenov.
