Búgin Qazaqstanda jańa bir palataly parlament – Quryltai depýtattaryn sailaý ótip jatyr. 145 depýtattyq mandatqa jeti saiasi partiiadan 545 kandidat talasýda. Osylaisha, bir mandatqa orta eseppen 3,8 kandidattan keledi, dep habarlaidy ult.kz.
Kandidattar qatarynda memlekettik qyzmetkerler, burynǵy Parlament depýtattary, kásipkerler, qoǵam belsendileri, jýrnalister, sportshylar, dárigerler men muǵalimder bar. Sonymen birge elge tanymal media tulǵalar da Quryltaiǵa depýtat bolýǵa nietti.
Máselen, «Ádilet» partiiasynyń tizimine Memlekettik keńesshi Erlan Karin, «Qazaqtelekom» basqarma tóraǵasy Baǵdat Mýsin, Májilistiń burynǵy depýtattary Ashat Aimaǵambetov, Aidos Sarym, Marat Bashimov jáne basqa da tanymal tulǵalar engen. Partiia jalpy 186 kandidatty usynǵan.
Qazaqstannyń halyq partiiasy 72 kandidatty usyndy. Olardyń arasynda ánshi Tamara Asar men aktrisa ári telejúrgizýshi Asha Matai bar.
Al Respublica partiiasynyń tiziminde mediaprodiýser Azamat Marklen men kásipker, mediatulǵa Beibit Álibekov bar.
Jalpy 545 kandidattyń 172-si – áiel, 74-i – 35 jasqa deiingi azamat, al 19 kandidattyń múgedektigi bar. Kandidattardyń ortasha jasy – 45,4 jas.
Quryltai sailaýyn ótkizýge 34,3 mlrd teńge bólingen. Bul qarajatty 145 depýtattyq mandatqa shartty túrde bólsek, bir orynǵa shamamen 236,6 mln teńgeden keledi. Alaida bul – sailaýdy uiymdastyrý shyǵynyn esepteýdiń arifmetikalyq kórsetkishi ǵana, depýtattyq mandattyń naqty «quny» emes.
