QR Parlamenti Senaty janyndaǵy Qarjy jáne biýdjet komitetiniń músheleri Qarjy ministrligi Memlekettik kirister komitetiniń jumysymen tanysty, dep habarlaidy joǵary palatanyń baspasóz qyzmeti.
Aldymen senatorlarǵa komitette byltyr iske qosylǵan bailanys ortalyǵynyń jumysy kórsetildi. Atalǵan ortalyqqa 1414 bailanys nómiri arqyly habarlasyp, kez kelgen azamat kiris pen shyǵysqa qatysty ózin tolǵandyrǵan suraqtarǵa jaýap ala alady.
Komitet ókilderiniń málimdeýinshe, ortalyqqa kúnine 300-ge jýyq qońyraý shalynyp, turǵyndardyń 80 paiyzy alǵan jaýaptaryna qanaǵattanady.
QR Qarjy ministrligi Memlekettik kirister komitetiniń tóraǵasy Marat Sultanǵazievtiń aitýynsha, biyldan bastap barlyq saýda júiesi onlain kassaǵa kóshýi tiis. Qazirgi kúni kassalyq apparat qurylǵysymen kóbinese shaǵyn jáne orta kásip ieleri qoldanady.
Sonymen qatar, Senat depýtattary komitet janynan pilottyq joba retinde qurylǵan ahýal ortalyǵynyń jumys barysymen etene tanysty.
Eger atalǵan pilottyq joba sátti júzege asyrylsa, el ishi men qatar shekaralyq, kedendik jaǵdaidy baqylaityn respýblikalyq aýqymdy ahýal ortalyǵy ashylatyn bolady.
Búginde ahýal ortalyǵynyń mamandary el shekarasy arqyly kiretin jáne shyǵarylatyn barlyq kedendik rásimderdi baqylap otyrady. Maqsat – kedendik qaýipsizdikpen qatar, taýar ainalymyn kóleńkeli ekonomikadan saqtaý.
Memleketik kirister komiteti mamandarynyń aitýynsha, ahýal ortalyǵy arqyly taýarlar ǵana emes, shekarany attaǵan árbir avtokólik tolyqtai tekserýden ótedi.
«Búginde Qarjy jáne Ulttyq ekonomika ministrligi birlesip salyq kodeksi týraly zańǵa ózgerister engizip jatyr. Osy oraida biz búgin senatorlar toby memlekettik kirister komitetiniń jumysymen tanysýdy jón kórdik. Elimizge syrttan keletin taýarlar men ónimderdiń qalai jetkiziletinin, iaǵni adamnyń qatysýynsyz tehnologiia men avtomattandyrylǵan qurylǵynyń kómegimen jumys isteitindigine kózimiz jetti. Bul óz kezeginde sybailas jemqorlyqtyń da aldyn alady. Demek biznes ókilderi zaman talabyna sai, jańa jaǵdaida jumys isteýge daiyn bolýy tiis. Sebebi, táýekeldi basqarý júiesi qatań baqylaýǵa alynǵan», - dedi QR Parlamenti Senaty Qarjy jáne biýdjet komitetiniń tóraǵasy Olga Perepechina.
O. Perepechinanyń aitýynsha, ózgerister men tolyqtyrýlar engizilip jatqan salyq kodeksi týraly jańa zań Senat qaraýynan soń ústimizdegi jyldyń sońyna deiin qabyldanady dep josparlanýda.
«Búgin memlekettik kirister salasyndaǵy sońǵy jańashyldyqtarmen tanystyq. Baiqanymyzdai, qazirgi ýaqytta zańdy tulǵalardyń tabysy men memleketke tóleýi tiis salyq mólsheri avtomatty túrde baqylaýǵa alynǵan. Degenmen zańdy álide bolsa qatańdatý qajet. Ásirese shekaradan zańsyz nemese talapqa sai emes taýar tasýshylarǵa aiyppul kólemin ulǵaitý qajet. Bul oraida bizder memlekettik kirister komitetiniń jańa usynymdaryn qoldaýǵa ázirmiz», - deidi QR Parlamenti Senaty Qarjy jáne biýdjet komitetiniń hatshysy Erbolat Muqaev.
