Búgin QR Parlamenti Senaty Ekonomikalyq saiasat, innovatsiialyq damý jáne kásipkerlik komiteti qashyqtan otyrys ótkizdi, dep habarlaidy "Ult aqparat".
Palatanyń baspasóz qyzmetinen málim etkendei, distantsiialyq otyrys barysynda birqatar máseleler talqylandy. Olardyń ishinde «Qazaqstan Respýblikasynyń keibir zańnamalyq aktilerine kóshi-qon protsesterin retteý máseleleri boiynsha ózgerister men tolyqtyrýlar engizý týraly» zań jobasy boldy. Bul qujat boiynsha eńbek jáne halyqty áleýmettik qorǵaý ministriniń orynbasary Aqmádi Sarbasov pen senator Álimjan Qurtaev baiandama jasady.
«Osy máseleni qaraý barysynda depýtattar Qazaqstannyń barlyq óńirleriniń aýmaǵynda sheteldik jumys kúshin tartýǵa arnalǵan kvotany qoldanýdy, oralmandardy ýaqytsha ornalastyrý ortalyqtary men beiimdeý jáne kiriktirý ortalyqtarynyń jumys isteýin, oralmandardy oqytý, qaita oqytý jáne jumysqa ornalastyrý máselelerin talqylady. Depýtattar sondai-aq zań jobasyn ázirleýshilerge oralman turaqty turýǵa arnalǵan qujattardy alǵan kezde memlekettik baj salyǵyn tóleýge, «oralman» uǵymyn paidalanýǵa, sondai-aq «qandas» jáne «repatriant» anyqtamalaryn engizýge qatysty suraqtar qoidy», - delingen aqparatta.
Odan keiin «Qazaqstan Respýblikasynyń keibir zańnamalyq aktilerine atom energiiasyn paidalaný salasyndaǵy azamattyq-quqyqtyq jaýaptylyq máseleleri boiynsha ózgeris pen tolyqtyrýlar engizý týraly» zań jobasy talqylandy. Bul másele boiynsha elimizdiń energetika ministriniń orynbasary Qairat Rahimov men senator Mihail Bortnik baiandama jasady.
Kún tártibindegi ekinshi máseleni qaraý barysynda senatorlar iadrolyq zalaldar úshin iadrolyq qondyrǵy operatorymen nemese iadrolyq qondyrǵylardyń biryńǵai operatorymen jasalǵan azamattyq-quqyqtyq jaýapkershilikti saqtandyrý sharty boiynsha saqtandyrý somasyn tóleý kózderin talqylady.
Zań jobalaryn talqylaý nátijesi boiynsha komitettiń qorytyndylary bas komitetterge jiberildi.
