Senattyń jalpy otyrysynda depýtat Aqmaral Álnazarova óz saýalynda jastardyń densaýlyǵyna qatysty máselelerdi kóterdi, dep habarlaidy "Ult aqparat".
Senatordyń aitýynsha, Qazaqstanda 15 pen 24 jas aralyǵyndaǵy jasóspirimder men jastardyń úlesi kem degende 20 paiyzdy quraidy. Sonymen birge, demografiialyq boljamdar boiynsha, 2025 jylǵa qarai osy jas tobyndaǵy halyqtyń úlesi ósedi dep kútilýde. Alaida senator sońǵy 3 jylda osy áleýmettik top ishinde jańa AITV - infektsiialarynyń (VICh) ósýi 43 paiyz bolǵanyn atap ótti.
«Áleýmettik zertteýler kórsetkendei, jasóspirimderdiń tek 9 paiyzynyń aýrýdyń berilý joldary týraly jan-jaqty bilimi bar, 60 paiyzy jynystyq jolmen beriletin infektsiialardyń aldyn alý ádisteri týraly bilmeidi, al naýqas jastardyń 62,6 paiyzy óz betimen emdelgen. Bul qalyptasqan ádettiń eń kóp taralatyn saldary - bedeýlik», - dedi Aqmaral Álnazarova Úkimet basshysynyń atyna joldaǵan depýtattyq saýalynda.
Senat depýtaty Qazaqstanda jastardyń 128 densaýlyq ortalyǵy jumys isteitinin jetkizdi. Biraq olar ýchaskelik emhana bólimsheleri túrinde ǵana jumys istep tur. Bul ortalyqtardyń damýyna kedergi bolatyndyǵyn kórsetedi.
«Sizden halyqaralyq standarttar negizinde jastarǵa qyzmet kórsetý boiynsha servistiń odan ári jetildirilýi men qol jetimdiligi úshin jaǵdai jasaýdy, barlyq oblystar men respýblikalyq mańyzy bar qalalarda zańdy derbes jastar densaýlyq ortalyqtaryn qurýdy qarastyrýdy suraimyz. Bul tolyq jáne sapaly meditsinalyq kómek kórsetý, jastar arasynda sanitarlyq-aǵartýshylyq jumystardy uiymdastyrý, tiisti kólemde qarajat bólý úshin kerek», - dedi Aqmaral Álnazarova.
