Senator Edil Mamytbekov elimizdiń Premer-Ministri Asqar Maminniń atyna joldaǵan depýtattyq saýalynda jerleý jáne zirattardy kútip-ustaýǵa qatysty problemalardy atap ótti, dep habarlaidy QazAqparat.
Depýtat 2017 jyly senator Olga Perepechina «Jerleý jáne jerleý isi týraly» zań jobasyn ázirleý qajettigi týraly saýal jariia etkenin eske saldy. Alaida salalyq memlekettik organdar bul máseleni elemei, sózbuidaǵa salyp jiberdi.
Endi Edil Mamytbekovtyń aitýynsha, qazirgi kezde zańnamalyq aktiniń bolmaýy bolashaqta problemaǵa ákelip soǵýy múmkin.
«Qazaqstanda salt pen jón-joralǵy qyzmetin kórsetetin jeke firmalar paida bola bastady. Olardyń sany qaýlap ósip barady. Zań qabyldansa, osyndai mańyzdy salany baqylap qana qoimai, ony qoljetimdi etýge múmkindik beredi. Sarapshylardyń pikirinshe, jerleý máselelerin retteitin zańnamalyq aktiniń bolmaýy túrli quqyq buzýshylyqtarǵa alyp keledi. Qylmystyq túrde jerleý, zańsyz biznesti júrgizý faktileri de bolýy yqtimal, eksgýmatsiia men jerleýdiń naqty erejeleri bolmai otyr», - dep atap ótti depýtat Senattyń jalpy otyrysynda.
Depýtat osyǵan bailanysty Premer-Ministrden salalyq mekemelerge jerleý, qoiý jáne zirattardy kútip-ustaý salasyndaǵy qoǵamdyq qatynastardy retteitin zańnamalyq aktini ázirleý jóninde sharalar qabyldaýdy surady.
