Senattyń jalpy otyrysynda depýtat Dáýren Ádilbekov óziniń saýalynda elektr energetikasy salasyna qatysty birqatar júieli problemalardy atap ótti, dep habarlaidy QazAqparat.
Atap aitqanda, senator bul salany qazir elimizde úsh ministrlik jáne kvazimemlekettik sektordyń eki kompaniiasy basqaratynyn, iaǵni biryńǵai salalyq organ bolmai turǵanyn ári biryńǵai ulttyq tariftik saiasat joq ekenin aitty.
Senatordyń aitýynsha, sonymen qatar energetika salasynda birqatar kompaniialar ózara kirigip ketken, bul oligopoliia men rásimderdi kórsetpeýge alǵysharttar jasaidy.
«Energetika salasynda óndirýshi, energiia jetkizýshi jáne energiiamen jabdyqtaýshy uiymdar arasynda tiginen integratsiialanǵan úlestes qurylymdar quryldy, bul osy salada oligopoliianyń bar ekenin bildiredi. Qazirgi ýaqytta elektr energiiasynyń 97%-y saýda protsesi ashyq kórsetilmeitin tikelei sharttar boiynsha satylady», - dep atap ótti Dáýren Ádilbekov Úkimet basshysy Álihan Smaiylovtyń atyna joldaǵan saýalynda.
Senator sondai-aq «Samuryq-Energo» men «Kegok» kompaniialaryn Energetika ministrliginiń qaramaǵyna berýdi jáne biryńǵai satyp alýshy júiesine kóshýdi usyndy. Mundai tásil elektr energiiasyn biryńǵai shekti baǵalar boiynsha satyp alýǵa jáne ony tutynýshylarǵa jariia talqylaýdan keiin bekitilýi tiis biryńǵai baǵalar boiynsha satýǵa múmkindik beredi.
«Bir memlekettik organ júzege asyratyn biryńǵai tariftik saiasat qajet. Tarifti kóterý energetikalyq kásiporyndarǵa qarsy mindettemelerdi, sondai-aq óndiristi jetildirý, jańartý, jańǵyrtý, shyǵyndardy azaitý talaptaryn júkteýge tiis. Memlekettiń baqylaý-qadaǵalaý fýnktsiialaryn, onyń ishinde investitsiialyq kelisimderdiń mindettemelerine, sondai-aq taýarlar men qyzmetterdi satyp alý protsesine qatysty fýnktsiialardy kúsheitý kerek», - dedi D. Ádilbekov.
