Qazaqstanda qazaq tilin biletin halyq úlesi 86 paiyzǵa jetti. Bul týraly QR Parlamenti Senatynyń Tóraǵasy Máýlen Áshimbaev aitty, dep habarlaidy QazAqparat.
«Ekonomikalyq jáne áleýmettik jańǵyrýdyń áleýmettik bazasy jáne qozǵaýshy kúshi retinde orta sanattyń qalyptasýy da mańyzdy ózgeris sanalady. Táýelsizdik jyldarynyń ishinde azamattarymyzdyń ortasha tabysy 13 eseden astamǵa artqanyn aitsaq da jetkilikti. Kásipkerler qatary da artyp keledi. Jeke bizneste jumys istep turǵan sýbektiler sany 2021 jyldyń 1 qańtarynda 1,4 mln-dy qurady. 2005 jyldan bastap bul úsh esege jýyq ósimdi quraidy», - dedi Senat spikeri Qazaqstan áleýmettanýshylarynyń VII kongresinde.
Onyń atap ótýinshe, ýrbanizatsiia qazaqstandyq qoǵamnyń áleýmettik stratifikatsiiasyna yqpal etetin mańyzdy trendterdiń biri sanalady. Táýelsizdik jyldary qala halqynyń sany 9 mln-nan 11 mln-ǵa deiin artyp otyr.
«30 jyldyń ishinde eldiń demografiialyq beiini, halyqtyń etnikalyq quramy ózgerip, jańa tildik orta qalyptasty. Qazaq tilin biletin halyqtyń úlesi 86 paiyzǵa jetti. Bul rette qazaqstandyqtardyń 92 paiyzy orys tilin biledi. Biz – jas ultpyz. Qazaqstandyqtardyń ortasha jasy shamamen 32-ni quraidy. Sonymen qatar ómir súrý uzaqtyǵy da uzaryp keledi», - dedi Máýlen Áshimbaev.
